Во последните информации за варијантите на Ковид, Британската агенција за здравствена безбедност (UKHSA) наведува дека во неделата на 14 август, подваријантата BA.4.6 изнесувала 3,3 проценти од сите позитивни тестови во Велика Британија. До денес, таа се проширила на дури 9 проценти од секвенционираните примероци, пишува „Science Alert“.
Исто така, податоците од Американскиот центрар за контрола и превенција на болести (ЦДЦ) покажуваат дека оваа подваријанта сега опфаќа над 9 проценти од сите неодамнешни случаи на коронавирус во САД. Варијантата е идентификувана и во неколку други земји низ светот.
Што знаеме за BA.4.6 и дали треба да се грижиме?
BA.4.6 е „потомок“ на варијантата BA.4 омикрон. Варијантата BA.4 за прв пат беше откриена во јануари оваа година во Јужноафриканската Република, од каде се прошири низ светот заедно со варијантата BA.5.
Не е сосема јасно како настанала подваријантата BA.4.6, но можно е да се работи за таканаречена рекомбинантна варијанта. Рекомбинацијата се јавува кога две различни варијанти на вирусот САРС-КоВ-2 заразуваат едно лице во исто време.
И додека BA.4.6 е слична на варијантата BA.4 на многу начини, таа сепак носи мутација на шилестиот протеин на површината на вирусот, која му овозможува да навлезе во човечките клетки. Таа мутација, R346T, е забележана во некои други варијанти и е поврзана со затајување на имунолошкиот одговор, што значи дека на вирусите со оваа мутација им е полесно да ги избегнат антителата настанати со вакцинација или претходна инфекција.
Не е сосема јасно како настанала подваријантата BA.4.6, но можно е да се работи за таканаречена рекомбинантна варијанта. Рекомбинацијата се јавува кога две различни варијанти на вирусот САРС-КоВ-2 заразуваат едно лице во исто време
Сериозност, инфективност и избегнување на имунолошкиот одговор
За среќа, инфекциите со варијантите на омикрон генерално резултираат со помалку тешка болест. Варијантата омикрон е помалку смртоносна од претходните варијанти на коронавирусот. Може да очекуваме истото да важи и за БА.4.6. Засега нема извештаи дека оваа варијанта предизвикува сериозни симптоми.
Сепак, знаеме и дека подваријантите на омикрон се позаразни од претходните. Се чини дека BA.4.6 е уште поуспешна во избегнувањето на имунолошкиот систем од BA.5, моментално доминантната варијанта. Иако овие информации се засноваат на студии кои допрва треба да бидат подложени на рецензија, останатите податоци ја поддржуваат оваа теорија.
Според информациите на UKHSA, раните проценки сугерираат дека BA.4.6 се шири побрзо во раните фази на инфекцијата отколку варијантата BA.5. Таа брзина, сепак, е дефинитивно помала од онаа на варијантата BA.5 во споредба со варијантата BA.2.
Универзитетот во Оксфорд известува дека оние кои примиле три дози од оригиналната вакцина на „Фајзер“ создаваат помалку антитела како одговор на варијантата BA.4.6 во споредба со BA.4 или BA.5, што е загрижувачко бидејќи сугерира дека вакцината против Ковид може да биде помалку ефикасна во борбата против BA.4.6.
Способноста на оваа подваријанта да го избегне имунолошкиот одговор може да биде донекаде намалена со новите бивалентни бустер вакцини кои ги напаѓаат конкретно омикронските подваријанти, заедно со оригиналната верзија на вирусот SARS-Cov-2. Ќе стане појасно со текот на времето.
Во исто време, една студија која чека на стручна рецензија покажала дека BA.4.6 ја избегнува заштитата обезбедена од Evusheld, терапија со антитела дизајнирана да ги заштити оние кои се имунокомпромитирани и не реагираат добро на вакцините.
Важно е внимателно да се следат новите подваријанти како што е BA.4.6 бидејќи тие би можеле да доведат до нов бран на пандемијата на Ковид. Важно е да се остане внимателен и да се следат сите мерки за заштита на јавното здравје со цел да се спречи ширењето на овој сè уште многу заразен вирус.
