Лимфните јазли се првата линија на одбрана од болести односно од инфекции кај децата. Со оглед на тоа дека се распоредени низ телото, тие ги собираат распаднатите продукти од организмот, односно ја пречистуваат лимфата.
Што предизвикува зголемени лимфни јазли и кога треба да се посети лекар?
Многу деца имаат т.н лимфатична конституција, па жлездите, најчесто на вратот, се присутни од раѓање и не треба да им се придава поголемо значење. Безопасните инфекции, најчесто од вирусно потекло, можат да предизвикаат зголемување на лимфните жлезди на вратот – се може да помине без температура, а исто така тие спонтано, по неколку дена, се повлекуваат. Тие се целосно безболни и лесно поминуваат.
Бактериските инфекции придружени со температура и воспаление на крајниците може да предизвикаат зголемување на подвиличните жлезди. Најчеста причина се стрептококните инфекции на грлото, иако причина може да бидат и други бактерии. Тогаш дефинитивно е потребно да се направат брисеви и да се даде соодветна антибиотска терапија, по што се повлекуваат жлездите.
Во последно време, честа инфекција кај децата е инфективната мононуклеоза предизвикана од вирусот Епштајн-Бар. Таа предизвикува зголемување на поголем број на лимфните жлезди, пред се во вратот, а понекогаш и на препоните и пазувите. Клиничката слика кај помалите деца е полесна, потребно е мирување, а во случај на компликации на црниот дроб и слезината треба да се направат и лабораториски испитувања (проверка на трансаминази).
