Еден од првите симптоми на новиот коронавирус кој е детектиран на почетокот на епидемијата, уште во Вухан во декември минатата година, бил зголемената телесна температура. Во меѓувреме, листата на симптоми се прошири, па така знаци дека можеби сте инфицирани со SARS-CoV-2 може да бидат и кашлица, дијареа, малаксалост…
Во најголемиот број на случаи (иако се покажало дека постојат и исклучоци), во зависност од тежината на симптомите, зависи и клиничката слика. Она што го истакнуваат стручњаците, е дека е многу важно да се реагира на појавата на првите симптоми и да се обратите кај својот матичен лекар, оти се покажало дека колку пациентот подолго чека, толку лекувањето потешко се одвива.
Зголемената телесна температура е еден од најчестите симптоми, но сепак не мора нужно да значи дека е знак на инфекција со новиот коронавирус.
Постојат вирусни инфекции кои за симптом ја имаат токму зголемената температура, а еве и за кои “предизвикувачи“ станува збор.
АДЕНОВИРУС
Аденовирусите најчесто предизвикуваат благи респираторни инфекции или грипозен синдром и често оваа инфекција поминува без симптоми. Може да се пренесат по капков пат, со допирање на површини кои не се чисти, па дури и со внес на храна што ја подготвил некој кој е заразен. Забележани се дури и ретки случаи на зараза преку вода, како што е пливање во базен.
Болеста најчесто се манифестира со кивавица, зголемена температура и малаксалост, а кај децата може да се забележат и симптоми на отежнато дишење, отоци околу очите и дехидрација.
ЕНТЕРОВИРУС
Постојат над 70 видови на ентеровируси кои напаѓаат милиони луѓе ширум светот. Се пренесуваат од фекалните материи, односно изметот, па хигиената е важна во нивната превенција.
Симптомите се температура, кашлица, кивање, течење на нос, но и осип по телото или слузокожата, како и болки во зглобовите и мускулите.
РОТАВИРУС
Ротавирусот можеби не изгледа како сериозна болест, но може да биде многу опасен за децата. Најчесто се јавува кај деца на возраст од една година, но може да се појави и кај постари деца, како и кај бебиња кои не цицаат. Делува на површинските клетки на цревата, односно на цревната слузница и во целост го оневозможува варењето. Се пренесува преку контакт со болно дете, најчесто преку валкани раце или нестерилни шишенца и цуцли. Најчести симптоми на ротавирусот се повраќање и пролив, висока температура и со 40 степени.
