СОБЛЕЧЕТЕ МУ ЈА ЈАКНАТА НА ДЕТЕТО КОГА ГО СТАВАТЕ ВО СЕДИШТЕ ВО АВТОМОБИЛОТ: Многумина грешат и не сфаќаат дека таквото возење е многу опасно  

Возењето на децата во автомобилско седиште е многу побезбедно, но ако ги возите во јакни, правите голема грешка.

Студеното време веќе започна, а возењето на децата облечени во јакни во седиштето во автомобилот е голема и честа грешка на многу родители. Јасно е дека се грижите да не им биде студено бидејќи автомобилот се уште не е загреан кога тргнувате некаде, но автомобилското седиште служи исклучиво за безбедно возење, што детската јакна не го дозволува.

Во случај на незгода или дури само остро и нагло сопирање, сигурносните појаси на детското седиште може да не се правилно затегнати преку телото на детето ако носи зимска јакна. Како резултат на тоа, автомобилското седиште не може доволно цврсто да го задржи детето во овие ситуации, за што е и дизајнирано.

Зошто зимската јакна не е добар избор за дете во седиште?

Повеќето зимски јакни се исполнети со материјали како што пердуви кои се дизајнирани да го загреат вашето дете создавајќи дебел “воздушен тампон“ помеѓу детето и студениот воздух надвор.

Меѓутоа, кога го ставате детето во автомобилско седиште со таква јакна, дебелината на јакната може да ве спречи да го затегнете ременот блиску до горниот дел од телото на вашето дете.

Во случај на удар, кога вашето дете е истуркано од седиштето и појасот треба да го задржи да остане на место, силите се толку силни што воздухот во јакната се ослободува. Ова доведува до тоа детето да има премногу простор за движење, бидејќи безбедносниот појас не е доволно затегнат за да го држи безбедно. Ова е причината зошто сите експерти и производители на седишта препорачуваат децата да се возат без јакни во седиштето во зима.

Како на детето да не му биде студено ако му ја соблечете јакната?

Јасно е дека се грижите дали на детето ќе му биде студено ако му ја соблечете јакната во седиштето, но еве неколку работи што можете да ги направите за да ја зачувате топлината, но и безбедноста:

  • Ставете шише со топла вода во седиштето 5-10 минути пред поаѓање, но секако извадете го пред да го ставите детето во автомобил.
  • Детето нека биде облечено во волнена облека бидејќи таа нуди добра изолација, а не е толку дебела да го попречува затегнувањето на ременот.
  • Земете дополнително ќебе со вас во автомобилот.
  • Ставете го детето во седиштето без јакна, затегнете ги ремените, а потоа облечете ја јакната од спротивната страна, така што закопчувањето да одие на грбот. Се разбира, не можете да ја закопчате, но ќе му биде топло и лесно може да се соблече кога автомобилот ќе се загрее.