Да се биде болен не е забавно во ниту еден период од годината, но во лето тоа е посебна мака, и за децата и за родителите. И тоа не само поради високите температури кои не опкружуваат, што го отежнува ладењето на детето со покачена температура, туку и поради зголемениот ризик од дехидрација.
Иако е лето и владее жештина, кога на детето му ја намалувате температурата со туширање, почитувајте го правилото тоа да го правите со млака вода, бидејќи така нема да му правите непријатност, а млаката вода и онака е со пониска температура од температурата на телото на детето. Главата на детето има голема површина и со ладење на главата побрзо ќе го оладите телото, затоа туширајте ја и главата и телото.
Туширајте го детето со млака вода 5 до 10 минути, а потоа добро исушете го и облечете се во чиста и сува облека. Додека го туширате детето, внимавајте просторијата да не биде премногу разладена со клима уредот и детето да не е директно изложено на воздухот што дува од клима уредот.
Ако ставате облоги, најдобро е да користите зовриена вода на собна температура. Водата се преврива за да се отстрани хлорот од неа, кој може да ја иритира чувствителната детска кожа. Може да се користи и дестилирана вода. Облогите ставете ги на градите и стомакот на детето, по можност памучна пелена натопена во млака вода и нежно исцедете ја. Над неа ставете сува крпа. Облогот менувајте го на секои 15 минути до половина час, кога целосно ќе се загрее. Исто така, внимавајте детето да не е директно изложено на клима уредот.
Важно е детето да биде доволно хидрирано!
Доколку детето има покачена температура во текот на летото, клучно е да се зголеми внесот на течности во организмот. Обидете се да го натерате детето да пие барем на секој час, а децата под три години почесто, дури и ако не се жедни. Исто така, можете да му дадете на детето сладолед бидејќи така ќе добие течност, а воедно ќе му ја олесни топлината и ќе му го смири грлото. Ако вашето дете не сака да пие или се сомневате дека е дехидрирано, побарајте лекарска помош.
Прилагодете ја надворешната температура
Ако ја направите удобна температурата во просторијата каде што детето престојува, многу ќе го олесните закрепнувањето на вашето малечко. Редовно проветрувајте ги собите, особено наутро и навечер, кога надворешната температура не е превисока Во текот на денот, спуштете ги ролетните и завесите, вклучете го вентилаторот и клима уредот, но поставете ја на умерена температура. Секако, детето не смее да биде во директен контакт со клима уреди или вентилатори.
За покривање изберете лесен памучен чаршаф, а детето облечете го во широка и памучна облека.
