За некои деца, дувањето нос е вистински проблем тоа да се научи, а мора да се признае и не е така едноставно, ако не знаете како. Тешко е на детето да му се објасни да го дува носот нанадвор, а не да вдишува и да влече се наназад во себе. Затоа е најдобро тоа да се вежба додека детето е здраво. Ова се некои трикови со кои успешно ќе ја совладате оваа техника. Секако, ќе учите, играјќи. Потребни ви се само хартиени марамчиња и уште некој реквизит.
1# Носомет – дување топчиња памук со носот во гол
Потребно ви е топче од памук, гол и рамна површина (терпезариска маса). Детето нека ја затвори едната ноздра и низ другата нека го дува памукот кој треба да заврши во импровизираниот гол.
2# Бркање дух од носот
Земете хартиено марамче и нежно пикнете го во едната ноздра, така што на детето ќе му изгледа како дух или некое друго чудовиште. Длабоко вдишете, а потоа брзо другата ноздра затворете ја и кажете му на детето да го издува духот од носот.
3# Трик со огледало
Потребно ви е мало огледало кое треба да се замагли со носот. Ставете го огледалото под носот и натпреварувајте се кој подобро ќе го замагли огледалото.
Сигурно се нервирате кога детето ќе го повлече секретот назад во носот. Од медицинска гледна точка, тоа не е толку лошо, бидејќи со неправилното дување на нос, секретот само може да се завлече во некои споредни тесни каналчиња. Тоа значи дека, воопшто не е страшно ако секретот некој пат се повлече и назад.
