Кога ќе станете родител, слушате многу предлози за тоа што треба да правите додека вашите деца спијат. Тоа време, без разлика дали е попладневна дремка или спиење во текот на ноќта, изгледа како некое магично време каде што се е можно и кога не го искористувате тоа време како што сакате или како што се очекува да го искористите, се чувствувате како да сте потфрлиле како родител.
„Кога не работев и цел ден бев дома со моите деца, многупати слушав и читав за тоа како родителите треба да го користат времето кога нивните деца дремат. Факт е дека дремките обично траат од неколку минути до неколку часа, а понекогаш тоа е единственото време кога родителот треба да се вразуми и да не „полуди“ целосно, а мислам дека тоа е многу поважно од чиста и уредна куќа. И мислам дека многу други родители еднакво се чувствуваат. Затоа, да бидеме искрени“, вели таткото Клинт Едвардс, автор на хумористични книги за родителство и наведува неколку работи што родителите всушност ги прават додека нивните малечки спијат.
- Седат на кревет и уживаат во тие неколку моменти кога никој не се качува на нив
Децата се качуваат на вас, ве влечат, негодуваат и цимолат и со секое дополнително качување, влечење, приговарање понекогаш имате чувство како да ќе „пукнете“. Затоа, попладневната дремка е единствената можност за родителот кој е цел ден со децата, да може да седи мирно и да се чувствува како човек. Сакам да нагласам, ова во никој случај не значи дека не ги сакаме нашите деца и нивниот неисцрпен извор на енергија, но ако го поминете цел ден со нив, знаете за што зборувам. Дремката може да биде единственото време што го има родител со полно работно време, а седењето во мир (дури и ако е само 15 минути) во вашето омилено катче од домот го олеснува остатокот од денот многу.
- Конечно гледаат нешто што навистина ги интересира
Постојат некои работи кои се изолирачки како малите деца и понекогаш гледањето нешто што не е Пепа прасе или Снежана или детски песни на Јутјуб е единственото нешто што ви помага да се чувствувате како да сте дел од светот на возрасните. Гледањето нешто на ТВ или компјутер што навистина ве интересира ви дава сила да го поминете остатокот од денот и потврда дека има нешто друго во светот покрај вашите деца и детскиот свет.
- Читаат книга која нема илустрации и содржи сложени реченици
Како и повеќето други родители, јас напамет ги знам сликовниците на моите деца и книгите за деца. Исто така, го знам речиси целиот дел со детски наслови во нашата библиотека и најчесто се чувствувам како да живеам со децата заедно со нивните омилени литературни херои. Но, како возрасен, морам да признаам дека ми недостигаат книги за возрасни кои го хранат нашиот мозок, кои имаат вистинска содржина, вистински заплет, структура и сложени реченици и кои ми кажуваат нешто за реалниот свет. Верувам дека не сум единствениот кој признава дека го користам времето кога децата спијат да читам книга во тишина и се чувствувам неверојатно среќен.
- Секс
За родителите на мали деца, има само неколку прилики кога можат да уживаат во сексот: тоа е попладневниот сон, вечерните часови кога децата спијат и кога децата се со трето лице, било да е тоа баба, дедо, бебиситерка, пријател и сл. Имено, сите опции имаат свои маани. Кога зборуваме за дремење, тоа обично не трае доволно долго, а кога децата ќе заспијат навечер, вие сте премногу уморни за било што друго. Но, она што е сигурно, ако имате избор помеѓу секс и чистење на домот кога децата спијат – изберете секс.
- Спијат
По само неколку часа спиење минатата ноќ, прилично е лесно да се заспие со децата за време на нивната попладневна дремка. И верувајте ми, попладневната дремка, откако сте будни поголемиот дел од ноќта – е една од најдобрите работи во животот!
