Ова се дел од препораките на епидемиолозите како треба да се однесувате во парковите и на детските игралишта, за што поефикасна заштита како на децата, така и на родителите и возрасните лица. Децата, според лекарите, најдобро е да изнесуваат во паркови и на игралишта кои се во близина на местото на живеење, оти на тој начин се намалува употребата на јавен превоз во кој можноста за заразување е многу голема.
- Нема делење играчки, сокчиња…
Генералните препораки се на отворено да се држи дистанца, а тоа значи дека децата треба да си играат во што помали групи – до пет деца. Ова единствено не важи за деца кои живеаат во исто домаќинство. Препорака е и децата да си играат само со свои играчки, а да нема делење ниту на храна и пијалаци. Децата треба да си играат и со оние играчки кои може да се перат или дезинфицираат.
- Редовно мијте ги и дезинфицирајте ги рацете на детето
Дезинфекцијата на рацете, покрај одржувањето дистанца е една од најважните мерки за превенција на ширењето на новиот коронавирус. Така, им се сугерира на родителите секогаш при себе да имаат средство за дезинфекција кое е на база на 70 проценти алкохол. При враќањето дома, задолжително темелно измијте му ги рацете на детето.
- Не носете ги децата со вас на пазарување
Освен во ситуации кога нема кому да му го оставите детето на чување, не носете ги децата по продавници и маркети, бидејќи во овие објекти фреквенцијата на луѓе е голема, а со тоа и ризикот од евентуална зараза.
- Децата до две години не носат маска
Децата помали од две години не треба да носат маски. Поголемите пак се препорачува да не носат маска подолго од два часа. Кога помало дете носи маска, тоа треба да биде под постојан надзор на родителите.
- Разговарајте со децата за коронавирусот
Лекарите советуваат родителите да ги едуцираат децата за значањето на придржувањето кон мерките. Низ игра, објаснете му на детето што претставува вирусот и и зошто сега треба да се избегнува гушкање, бакнување и други блиски контакти со други лица. Истовремено, едуцирајте ги и за одржувањето хигиена на рацете.
