Исмејувањето на сметка на вишокот килограми, ќе предизвика кај децата дополнително дебелеење, открило истражувањето. Имено, научната студија објавена во списанието Pediatric Obesity, пронашло врска помеѓу шегите на сметка на телесната тежина и промената во индексот на телесната маса на децата.
Научниците од американскиот Национален институт за здравје, следеле 110 деца и млади кои биле гојазни или под ризик тоа да станат. Просечната возраст на учесниците била 12 години.
Во првата фаза, децата откриле колку често се исложени на насилство, или врсниците им се исмејуваат поради вишокот килограми. Научниците, потоа, ги следеле нивните промени низ периодот од осум до 15 години.
Низ годините, кај децата кои пријавувале дека биле исмејувани на сметка на телесната тежина било забележано зголемување во индексот на телесна маса за 33%, и 91% по прашање на телесните масти, во однос на нивните врсници кои воопшто не биле изложени на исмејување.
Научниците велат дека нивното истражување било опсервациско, па не можат јасно да ја докажат причината и последицата, но заклучиле дека исмејувањето на децата поради дебелината е поврзано со нивно понатамошно дебелеење.
Авторите на студијата велат дека стигмата поврзана со тежината можеби е таа која предизвикала поголема веројатност децата да се впуштат во нездраво однесување, како што е прејадување, избегнување на физичка активност и слично, но и дека исмејувањето стимулира ослободување на хормонот кортизол, што може да доведе до зголемување на телесната тежина.
