Можеби некој од вас се сеќава на тоа непријатно чувство кога нашите родители во наше присуство за нас зборувале со други луѓе, како да не постоиме. Без разлика дали раскажувале некоја банална приказна или нешто поинтимно, игнорирајќи ги нашите емоции. Не правете им го ова на вашите деца.
Детето ја заслужува нашата почит
Со текот на времето, дури и малите бебиња почнуваат да чувствуваат кога зборуваме за нив, па се вртат и ги следат нашите движења со очите. Можеби нема да ја разберат содржината, но ќе го разберат тонот и намерата на она што го кажуваме.
Како што расте детето станува посвесно за себе и за својата околина и почувствително на одредени ситуации кои му се случуваат. Децата се чувствуваат непријатно поради сопствените грешки или ситуации кои не можат да ги контролираат. Кога ги споделуваме нивните болни приказни со другите, игнорирајќи ги нивните емоции, ризикуваме да ја изгубиме довербата на детето во иднина.
Што можете да кажете поинаку
Наместо да кажете некому дека детето поминало добро во градинка, предложете му тоа само да му раскаже на другото лице како му било.
Наместо да кажете дека детето овие денови често моча во гаќи во градинка, иако научило да користи тоалет, напишете му порака на другиот и не го изложувајте детето на непријатна ситуација.
Наместо да го претставувате детето на некој друг, прашајте го дали само би се претставило и би кажало колку години има. Вака му покажувате дека е рамноправно со возрасните и дека неговиот глас вреди да се слушне.
