Хрватска ja регистрираше првата реинфекција со коронавирус. На подрачјето на Бјеловарско – Билогорската жупанија е забележан случај на жена на средна возраст, која прв пат се разболела од коронавирус во септември, а сега повторно добила позитивен тест.
Докторката прво помисли дека станува збор за бронхитис и ми препиша антибиотик, сведочи пациентката
„Првиот позитивен резултат го добив на почетокот на септември, откако се тестирав затоа што требаше да бидам хоспитализирана со детето. Детето тогаш беше негативно, а јас бев позитивна, иако немав никакви симптоми“, раскажала пациентката, чие име е познато на редакцијата на кликни.хр.
Поради тоа што ја преболела короната пред само три месеци, не ни помислувала дека симптомите (болка во градите, треска, болки во грлото и главоболка) што ги добила минатата недела може да укажуваат на инфекција со коронавирус.
„Докторката прво помисли дека станува збор за бронхитис и ми препиша антибиотик, а потоа во понеделникот реши повторно да ме прати на тест за коронавирус. Ме тестираа во саботата и, еве, утрово, добив позитивен резултат. Секако, тоа беше шок затоа што бев убедена дека уште некое време не можам повторно да се разболам“, раскажа таа за хрватскиот портал.
Главниот жупаниски епидемиолог, Весна Гргиќ, претпоставува дека пациентката, која немала никакви симптоми првиот пат, тогаш не развила антитела, што довело до повторна инфекција. Таа нагласува дека е можно да имало повеќе такви случаи, но дека тие едноставно не биле евидентирани.
