Почнувајќи од октомври 2020 година, истражувачи од Тексас ја проучувале состојбата на 218 испитаници на возраст од 5 до 19 години кои се опоравиле од инфекција со коронавирус.
Секој испитаник трипати дал примерок од крв во интервали од три месеци. Повеќе од 90 отсто од нив биле невакцинирани кога започнала студијата.
Првиот тест на крвта покажал постоење на антитела поврзани со инфекцијата кај само една третина од децата (37%), објавија научниците во списанието Pediatrics, официјално гласило на Американската педијатриска академија.
По шест месеци, антитела во крвта имале само половина од испитаниците кај кои и претходно било утврдено присуство на антитела.
Студијата е направена со цел да се открие присутноста на антитела, а не количината во крвта. Од претходно е познато дека тие се само една компонента на одбраната на имуниот систем.
НИВОТО ЗА ЗАШТИТА КАЈ ДЕЦАТА СО АНТИТЕЛА НЕ Е ЈАСНО
Нивото на заштита кај децата и адолесцентите со антитела е нејасно. Научниците не успеале да ги откријат разликите врз основа на тоа дали болеста кај детето била асимптоматска, врз основа на сериозноста на симптомите во моментот кога заболеле од коронавирус, ниту пак врз основа на тежината или полот на детето.
“Резултатите за сите беа исти“, вели Сара Месаја од Медицинската школа за јавно здравје во Далас.
“Некои родители мислат дека нивните деца, само затоа што прележале КОВИД-19, потоа се заштитени и дека не треба да се вакцинираат поради тоа. Но, тоа не е така, а ние имаме на располагање одлична алатка со која можеме да обезбедиме дополнителна заштита на децата – вакцината“, вели д-р Месаја.
