РЕЦЕПТ НА ДЕНОТ: Палачинки со сирење и спанаќ

Палачинките се секогаш добар избор бидејќи може да се подготват и во солена и во блага варијанта. Тие се омилено јадење на децата, а кога ќе ги подготвите во солена варијанта може да им ги понудите и како главен оброк во комбинација со некоја салата.

Потребно:

За палачинките

  • 2 јајца
  • 200мл минерална вода
  • 200мл млеко
  • ½ лажичка сол
  • 350гр брашно (ако смесата е ретка, додадете и повеќе)

За филот

  • 150гр смрзнат спанаќ
  • 1 лажица путер
  • 2 лажици брашно
  • Лук во прав
  • Малку сол
  • 100мл млеко
  • 500гр урда или кравјо сирење
  • 2 јајца
  • 1 кисела павлака

Подготовка: Состојките за палачинки измешајте ги и испечете палачинки. Филот подгответе го така што путерот ќе го растопите во тавче, ќе го додадете брашното, па по една минута со постојано мешање ќе го додадете спанаќот. Додадете го млекото, солта и лукот во прав. Почекајте се убаво да се соедини, да не биде смесата многу ретка. Во друг сад измешајте ги јајцата со урдата, па додадете ги во смесата со спанаќ и убаво измешајте. Тавчето за печење премачкајте го со масло, наполнете ги палачинките, наредете ги и на крај прелијте ги со киселата павлака во која може да додадете една жолчка. Ставете да се пече на 180 степени околу 35 минути. Добар апетит!