Зголемена телесна температура и сува кашлица, губење на осетот за мирис и вкус се меѓу најчестите симптоми на новиот коронавирус. Но, тие не се единствените знаци на инфекција со SARS-CoV-2 – екстремен замор, губење на здив, губење на апетит, промени на стапалата, осип, нагласено опаѓање на косата…
Иако не почетокот се мислеше дека децата не можат да се заразат, бројни случаи во светот го докажаа спротивното. Она кое донекаде е утешително е дека КОВИД-19 кај децата најчесто се јавува во поблага форма.
Почна сезоната на грип и настинки, дел од децата се во училиште, дел во градинка и иако засега состојбата по воспитно-образовните установи е под контрола, стручњаците предупредуваат на важноста од придржување на епидемиолошките мерки.
КАКО ДА ЗНАЕТЕ ДАЛИ Е КОВИД-19 ИЛИ ОБИЧНА НАСТИНКА?
Група стручњаци од Институтот за здравје на децата при детската болница Great Ormond Street од Лондон, ја следела состојбата на 582 заразени деца на возраст од три до 18 години од 25 европски земји. Во пикот на епидемијата во април, сите тие биле позитивни на новиот коронавирус, а една четвртина од нив имале пропратни здравствени проблеми.
Децата најчесто имале зголемена телесна температура – 65%, со инфекција на горните дишни патишта се соочиле 54% од децата, воспаление на белите дробови имале 25% и гастроинтестинални симптоми јавиле 22 проценти од децата. Околу 16 проценти од децата, биле тестирани бидејќи имале контакт со заразено лице, но не покажувале никакви симптоми.
Друга студија спроведена во Белфаст, во која учествувале околу 900 деца на возраст до 15 години, а од кои ниту едно не било во состојба која барала хоспитализација, сугерура дека дијареата и повраќањето се најизразените симптоми.
“Во нашата група, дијареата и повраќањето беа најизразени во споредба со кашлица или губење на осетет за мириси вкус. Ако сакате да дијагностицирате инфекција кај децата, мора да почнете да барате дијареа и повраќање, а не само респираторни симптоми“, смета еден од авторите на студијата, проф. Том Вотерфилд.
Тој нагласува дека процентот на позитивни во однос на бројот на тестирани на основа на три постоечки симптоми е околу 76 проценти, додека со додавање на гастроинтестиналните тегоби на листата на симптоми, вирусот би бил потврден кај 97 проценти од случаевите.
