Колективен имунитет на коронавирусот веројатно нема да може да се постигне без вакцинирање на децата и адолесцентите, објави Здружението за имунологија на Германија.
“Вообичаено се мисли дека колективен имунитет ќе се постигне кога 60 до 70 проценти од населението ќе биде заштитено од патогени. Но, тоа претпоставува дека вирусот не може да се репродуцира кај тие лица“, објаснува потпретседателот на Здружението, Реинхолд Форестер.
Според него, со вирусот SARS-CoV-2 тоа е поинаку: луѓето може да го пренесуваат вирусот иако самите не се болни, дури и ако се вакцинирани.
Делта варијантата на вирусот само ја влошува таквата ситуација, нагласува тој.
“Таа е многу позаразна. И многу ги погаѓа адолсцентите и децата. Се додека тие групи не се воопшто вакцинирани или ако се вакцинирани само малку, нема да се постигне колективен имунитет“, појаснува тој.
Според германскиот институт Роберт Кох за контрола на болести, најмалку 85 проценти од населението на возраст помеѓу 12 и 59 години и 90 проценти на оние над 60 години мора да се вакцинираат за успешно да се бори против делта варијантата на коронавирусот.
“Кога таа стапка на вакцинираност би се постигнала на време, најавениот четврти бран во есен/зима ќе биде помалку веројатен“, велат имунолозите.
Засега не е издадена општа препорака за вакцинирање на децата и младите над 12 години, а за оние под 12 години нема одобрена вакцина.
