ВАШИТЕ ПРАПРАПРАВНУЦИ СÈ УШТЕ ЌЕ СЕ ИМУНИЗИРААТ ПРОТИВ КОРОНАВИРУС: Врвен експерт од клиниката Мајо предвидува дека Ковид-19 ќе биде тука до следниот век

Дозволете ми да дадам предвидување, на кое ќе му биде тешко на некој од вас да ме држи за збор бидејќи дотогаш сите ќе бидеме мртви, но вашите прапраправнуци сè уште ќе се имунизираат против коронавирусот. Како воопшто можам да кажам такво нешто? Ако ја примивте вакцината против грип оваа есен, бевте имунизирани против варијанта на грип кој се појавил во 1918 година и предизвикал пандемија, изјави Д-р Грегори Поланд, врвен експерт за вакцинација и имунологија

Додека многу Американци почнуваат веќе да гледаат кон животот после Ковид-19, а некои експерти даваат оптимистички предвидувања за иднината на пандемијата, со тоа не се согласува целата научна заедница.

Д-р Грегори Поланд, епидемиолог од клиниката Мајо, главен уредник на стручното списание „Vaccine“ и еден од врвните експерти за вакцинација и имунологија, изјави дека вирусот би можел да ги засега луѓето се до наредниот век.

„Сè уште не сме во фаза во која би можеле да ја предвидиме ендемичноста на вирусот“
Д-р Грегори Поланд

Во разговор со „MarketWatch“, тој даде сериозно предвидување што се спротивставува на она што го велат некои светски глобални здравствени експерти.

Поради брзото пренесување на варијантата омикрон во комбинација со нејзината поблага природа, експертите се надеваат дека тоа е сојот што ќе го префрли вирусот од пандемски во ендемски, што значи дека моделот на вирусот е стабилен и предвидлив. Но, д-р Поланд не ја дели истата оптимистичка гледна точка.

„Сè уште не сме во фаза во која би можеле да ја предвидиме ендемичноста. Нема да го искорениме“, рече д-р Поланд.

Тој истакна дека вирусот покажал способност да заразува животни, што значи дека потенцијално може да циркулира на неодредено време додека се пренесува низ видовите и продолжува да мутира.

Д-р Поланд верува дека вирусот ќе циркулира толку долго што луѓето сè уште ќе примаат вакцини против Ковид-19 со генерации.

„Значи, дозволете ми да дадам предвидување, на кое ќе му биде тешко на некој од вас да ме држи за збор бидејќи дотогаш сите ќе бидеме мртви, но вашите прапраправнуци сè уште ќе се имунизираат против коронавирусот.

„Како воопшто можам да кажам такво нешто? Ако ја примивте вакцината против грип оваа есен, бевте имунизирани против варијанта на грип кој се појавил во 1918 година и предизвикал пандемија“.

Ова не е прво мрачно предвидување кое д-р Поланд го дава. Тој за „Дејли мејл“ изјави дека верува дека 32.000 луѓе ќе умрат од Ковид од почетокот на декември до крајот на годината.

„32.000 Американци кои мислат дека ќе останат живи за да ги слават Божиќ и Нова Година, потполно грешат“, рече тој на 9 декември минатата година.

„Ниту еден од нив не верува (дека ќе умре)“.

Во тој период, регистрирани се 31.000 смртни случаи од Ковид во САД, речиси колку предвидувањето на д-р Поланд, според податоците на „Our World in Data“, пренесува „Дејли мејл“.