Постпородилната депресија се јавува кај мајките во првите недели по породувањето. Но, малку е познато дека оваа состојба може да се јави и кај татковците.
Дали е можно јас да сум во депресија, наместо мојата жена?
Сосема е можно! Кога се зборува за депресија по раѓање на детето, често се забораваат татковците во таа приказна. Студиите покажуваат дека 10% од татковците патат од депресија по раѓање на детето, независно од тоа дали мајката е во состојба на постпородилна депресија или не.
Зошто се чувствувам толку потиштено кога имам преубаво и здраво дете и љубов од мојата сопруга?
Причините за појава на депресија кај мажите и кај жените се различни. Мажите може да чувствуваат дека финансиската одговорност е на нивниот грб. Можно е да се чувствувате лошо бидејќи сте навикнале на поинаков живот, па сега наместо забава и излегувања, треба да седите дома и да се грижите за бебето. Можеби ве загрижува дали ќе бидете добар татко. Можеби ви недостасува сопругата, која сега повеќе време поминува со бебето, отколку со вас.
На сопругата и помина постпородилната депресија, но мене се уште ме држи. Кога ќе помине?
И вие многу брзо ќе ја надминете состојбата, само треба да сфатите дека се што ве мачи во моментот е минливо: сопругата ќе се врати на работа и работите ќе тргнат по вообичаено. Многу брзо ќе се снајдете и во планирањето на вашите друштвени активности кога бебето ќе влезе во свој ритам или ќе почнете да се дружите со слични семејства кои имаат мало бебе. А, и сопругата ќе ви посвети повеќе внимание кога бебето малку ќе порасне.
Во секој случај, одреден дел од денот и посветете си го за себе. Во првите недели по раѓање на бебето главно се случува да не воочувате некои ситни работи. Направете некоја стратегија за да успеете да се наспиете и одморите, активно да вежбате, да уживате во омилената храна. Тоа важи за двајцата родители. Многу е важно да останате блиски со партнерот. Ако се чувствувате исклучени, за тоа зборувајте со сопругата и обидете се најдете заедничко решение за тој проблем – можеби не сте се ангажирале доволно околу бебето и поради тоа, сопругата нема доволно време за вас.
