По вакцинирањето против Ковид-19, можни се некои лесни несакани ефекти кои вклучуваат блага болка на местото на инјектирање и температура. Сепак, според досегашните податоци, се чини дека жените понекогаш може да имаат некои посериозни несакани ефекти по вакцинацијата. Претходните истражувања покажаа дека жените пријавуваат несакани ефекти во поголема мера отколку мажите.
Студија објавена во списанието ЈАМА во февруари покажала дека жените по вакцинацијата во поголема мера доживуваат несакани ефекти. Во извештајот објавен од Американскиот центар за контрола и превенција на болести (CDC) се наведува дека меѓу 6.994 испитаници кои пријавиле несакани ефекти, 79,1% од нив биле жени.
Сè уште не е целосно јасно зошто жените доживуваат несакани ефекти во поголема мера. Сепак, некои сугерираат дека жените имаат поактивен имунолошки систем и дека хормоналните разлики исто така би можеле да бидат причина зошто постојат разлики во пријавувањето на несакани ефекти.
Истражувања покажаа дека жените во поголема мера пријавуваат несакани ефекти отколку мажите
Според досега собраните податоци, постојат неколку несакани ефекти кои често се јавуваат кај жените.
Стомачни грчеви
Некои жени пријавиле пообилни месечни циклуси откако биле вакцинирани против Ковид-19, но ова сè уште не е наведено како официјален несакан ефект. Некои експерти веруваат дека вакцините можат да предизвикаат некои имунолошки реакции кои влијаат и на згрутчувањето, што може да влијае на менструацијата. Покрај тоа, жените по вакцинацијата почесто пријавуваат и грчеви во стомакот.
Отечени лимфни јазли
Еден од невообичаените несакани ефекти што се јавуваат кај жените се отечените лимфни јазли, а се чини дека овој несакан ефект е почест кај жени кои примиле mRNA вакцина. Но, засега, причината не е целосно јасна. Покрај тоа, може да се појави оток, болка во раката на која е примена вакцината и осип.
Гадење
Вакцините можат да предизвикаат типични реактогени ефекти, но кај некои луѓе, особено жени, може да се јават болки во стомакот и гадење. Некои жени пријавиле благо до умерено гадење по вакцинирањето, а овој несакан ефект обично поминува сам по себе.
Поизразена болка во телото и треска
По вакцинацијата може да се појават болки во телото, треска или грозница. Но, се чини дека жените имаат посилни болки отколку мажите, пишува „Тајмс оф Индија“. Понатаму, се чини дека болката кај некои може да биде поизразена по втората доза на вакцината. Сè уште не е целосно јасно што е причината, но се претпоставува дека се работи за имунолошкиот одговор поттикнат од хормоналната нерамнотежа.
