Македонија вчера во својот црн биланс од битката со коронавирусот го запиша најмладиот пациент, 31-годишно момче од Скопје, кое починало во претпладневните часови на Инфективната клиника во Скопје, каде што се лекувал во изминатите шест дена.
Министерот за здравство Венко Филипче објасни дека момчето имало најтешка форма која е досега опишана во медицинската литература за компликации од коронавирус.
Вирусот не штеди никој – никој не е имун ниту е заштитен од него
„Кај помладиот починат пациент имаше нагло влошување на состојбата. Веднаш е поставен на респиратор меѓутоа неговата клиничка слика е со крвавење и практично распад на белите дробови. Еден ризик фактор кај него е обезноста што ја имал. Обезноста во вакви случаи е ризик фактор“, изјави министерот Филипче на прес конференција.
Згаснатиот млад живот е уште едно предупредување за сериозноста на вирусот.
„Ова е доказ дека вирусот не штеди никој – никој не е имун ниту е заштитен од него. Сите оние кои досега можеби не беа убедени во опасноста од вирусот и од оваа болест, сега верувам дека им е целосно јасно дека ова е многу сериозна закана. Навистина мораме ние сериозно да се однесуваме кон неа, нема да биде лесно. Затоа сакам да упатам апел сите да ги почитуваат препораките, да не се шири паника, да се однесуваме максимално претпазливо и одговорно заради тоа што ова зависи од секој успех, оваа борба зависи од секој еден од нас“, изјави министерот Филипче.
Дебелината може да го ослабне имунитетот на организмот и да го зголеми воспалението што ја отежнува способноста на телото да се бори
Дебелината како ризик фактор за сериозни компликации од коронавирус не е непозната. Имено, истражувањата покажуваат дека пациенти со коронавирус кои се дебели се изложени на поголем ризик да станат критично болни од оваа болест.
Д-р Стефан де Херт, поранешен претседател на Европското здружение за анестезиологија, потврдува дека дебелината е еден од најчестите ризик фактори кај пациентите примени во единиците за интензивна нега во Италија, пишува „Metro UK“.
„Средната возраст кај сите пациенти со KОВИД-19 е 70 години, а еден од најголемите фактори на ризик за прием на интензивна нега е дебелината“, вели д-р Стефан де Херт од Универзитетската болница „Ghent“ во Белгија, откривајќи дел од податоците за Италија, кои се уште не се објавени.
Британскиот весник пишува дека здравствените власти предупредиле дека дебелината може да го ослабне имунитетот на организмот и да го зголеми воспалението, што ја отежнува способноста на телото да се бори со микробите.
Вишокот на килограми, исто така, може да изврши притисок врз белите дробови, зголемувајќи го ризикот од компликации на коронавирусот.
Венко Филипче: Пред нас е најтешкиот период – период во кој бројот на заболени ќе расте во светот, ќе расте и кај нас
„Вирусот не заобиколи ниту една една земја, не ја заобиколи ниту нашата. Пред нешто повеќе од еден месец како беше регистриран првиот позитивен случај и од тогаш до денес бројката на потврдени случаи постојано расте. Добро е што бројот на случаи се зголемува линеарно, а не експоненцијално – што значи дека секој ден имаме приближно еднакво зголемување, а тоа му дава шанса на нашиот систем за одржливост – можност соодветно да ги прими, да ги амортизира сите пациенти без притоа да бидат оптоварени нашите капацитети. Сакам да упатам јасна порака дека влегуваме во вториот месец од борбата со оваа пандемија која целосно го промени животот, донесе страв и несигурност. Пред нас е најтешкиот период – период во кој бројот на заболени ќе расте во светот, ќе расте и кај нас. Ни претстои период за жал во кој ќе расте и бројот на починати, за ова сите мораме да бидеме свесни.“
Во Велика Британија, исто така, е утврдено дека дебелината играла улога во тешките случаи на КОВИД-19, откако новите податоци откриваат дека скоро две третини од пациентите на кои им е потребна интензивна нега биле со прекумерна тежина, пишува „Metro UK“.
The National Health Service’s Intensive Care National Audit and Research Center објави студија која открива дека 127 од 196 случаи на интензивна нега (ICU) биле со прекумерна тежина.
Од критично болните пациенти, имало 71 кои имале БМИ 30 или повеќе, што се смета за обезност, покажува студијата.
