Бебињата спијат цел ден. Со текот на времето, како што растат им треба сè помалку сон. Покрај тоа што повеќе не им треба толку многу сон, во нивното опкружување има толку многу возбудливи работи, како играње или поминување време со родителите, што не вреди да се губи време за спиење. Премореноста, недостатокот на цврст ритам исто така може да бидат причини зошто детето не може да заспие, како и фактот дека неговиот сон во текот на ноќта е всушност доволен.
Зошто на децата им е потребен дневен сон?
Кога спие, детето се релаксира, обработува искуства и ментално и физички се одмора. Но, спиењето е важно за децата и од аспект на развој. За време на спиењето се лачат хормони за раст и се зајакнува имунолошкиот систем. Поради тоа, недостатокот на сон може да му наштети на здравјето на детето, како и на растот.
Колку сон им треба на децата?
На дете на возраст меѓу 9 и 18 месеци му требаат 14 часа сон, двапати во текот на денот и во текот на ноќта. Во овој период, некои деца ја одбиваат претпладневната дремка и спијат само попладне. Оваа промена се случува кај секое дете во свое време. Околу 2-годишна возраст четвртина од децата одбиваат попладневна дремка. Меѓутоа, на детето на таа возраст и понатаму му требаат 10 до 12 часа сон, кои може да ги исполни за време на ноќниот сон.
Секогаш има исклучоци од горенаведеното, затоа треба да го набљудувате сопственото дете. Ако чувствувате дека вашето дете е одморено, живо, расположено и не покажува знаци на замор, не го присилувајте да спие повеќе. Разговарајте со педијатар.
Што да направите кога детето одбива дневен сон?
- Побарајте причина
Дали детето можеби имало многу бурно и активно претпладне? Можеби гледало премногу телевизија или добило нова возбудлива играчка? Сето ова може да бидат причини зошто тоа е премногу возбудено за да заспие. Потрудете се претпладнето да помине со помала возбуда и детето да се смири навреме. А можеби имало кратка дремка во кола на враќање од продавница. Во тој случај не е поспано.
- Следете ја вкупната должина на спиењето
Ако детето не спиело доволно ноќе, тогаш треба да бидете доследни кога го воведувате попладневниот сон. Важно е детето да се наспие.
- Избегнувајте расправии
Попладневното спиење не треба да предизвикува постојани расправии со детето. Останете смирени и објаснете му на вашето дете зошто е важен дневниот сон. Можеби ќе му помогне ако види дека и вие ќе дремете кратко после ручекот. Тогаш нема да се чувствува како нешто да пропушта. А и вам ќе ви годи 20 минути сон што ќе ве освежи.
- Ритуали за сон
Помагаат истото време за спиење и малите ритуали. За дневното спиење можете да користите некои од ритуалите, како и за ноќен сон.
- Какво е детето?
Дали е уморно? Дали воопшто веќе му треба дневен сон? Секое дете е различно во потребите за сон. Можеби вашето припаѓа на групата на која рано престанува да има потреба од дневен сон.
- Нема смисла да се принудува
Бидете доследни, но не користете физичка сила. Ова нема да ви помогне ниту вам ниту на детето кое два часа ќе седи во собата, плачејќи или врескајќи. Ако детето постојано одбива попладневна дремка, тогаш дајте му ја омилената играчка и кажете му дека мора тивко и мирно да си игра со неа. Од неговото однесување тогаш може да се види дали навистина му недостасува дневен сон и колку желбата да не спие е поврзана со моменталната еуфорија.
