Се чини дека возраста на која девојчињата добиваат прва менструација станува помлада. Ова го потврдува и нова, голема студија објавена во JAMA Network Open. Резултатите од студијата покажале и дека на менструалните циклуси на девојчињата во последните 55 години им треба повеќе време за да постигнат „редовност“, односно имаат постојан циклус од месец во месец. Се наведува дека пораниот почеток на циклусите и подолгите нередовни менструации може да бидат поврзани со здравствени ризици подоцна, а експертите се загрижени поради тоа.
Во рамките на Апл студијата за здравјето на жените, 71.321 учесничка одлучиле да споделат податоци за нивниот циклус. Истражувачите ги анализирале податоците и откриле дека првиот циклус (менарха) кај жените е поместен од 12,5 години за оние родени од 1950 до 1969 година на 11,9 години за оние родени од 2000 до 2005 година. Поместувањето е мало, но значајно. До истиот резултат дошле и повторувани претходни истражувања.
Од 62.000 учесници кои пријавиле регуларност на нивните циклуси, процентот на оние чии циклуси станале редовни во рок од две години по менструацијата се намалил од 76% на 56%. Авторите на студијата, исто така, откриле двојно зголемување кај девојчињата кои почнуваат со менструација „рано“ (пред 11 години) или „многу рано“ (пред 9-годишна возраст), што предизвикува загриженост дека повеќе жени може да бидат чувствителни на неповолни здравствени исходи поврзани со раната менарха. Тие, исто така, забележале пад кај оние кои подоцна добиле менструален циклус.
Но, најголемиот проблем е што почетокот на менструацијата на млада возраст може да има лоши здравствени последици.
Какви здравствени ефекти има пораниот почеток на менструацијата?
„Откривме дека на девојчињата им треба подолго време за да ја достигнат регуларноста“, вели Зифан Ванг, водечки автор на студијата и постдокторски научник на Харвард Школата за јавно здравје.
„Ова е исто така многу загрижувачки бидејќи нередовните циклуси се важен показател за негативни здравствени настани подоцна во животот. Тоа е алармантно. Мораме порано да советуваме и да интервенираме кај појавите на нередовни циклуси меѓу децата и адолесцентите“, додава тој.
Менструалниот циклус се смета за витален знак за здравјето, а подолгите нередовни менструални циклуси може да укажуваат на долгорочни здравствени ризици, како што се кардиоваскуларни болести, дијабетес, ревматоиден артритис, состојби на ментално здравје и одредени видови на рак, вклучително и рак на дојка. Нередовните циклуси се исто така поврзани со предменструален синдром (ПМС), а претходни студии откриле дека ПМС е исто така значаен фактор на ризик за постпородилна депресија.
Имено, телото на кое му треба подолго време да воспостави стабилност на циклусот е поврзано со поголеми шанси за нередовни циклуси во текот на репродуктивните години, што може да биде фактор кој придонесува за борбата со неплодноста. Исто така, постои корелација помеѓу девојчињата кои рано минуваат низ пубертетот и зголемениот ризик од сексуална злоупотреба, за што е важно да се биде свесен.
Кои се ограничувањата на оваа студија?
Дали наодите од оваа студија може да се применат на општата популација? Одговорот веројатно е не. Поради природата на студијата о која учесниците сами се пријавувале, постои одреден ризик од пристрасност или погрешна класификација кога од учесникот се бара да се потсети на искуството со менарха.
Покрај тоа, студијата не се темелела на случаен примерок: учесниците морале да имаат посебен телефон или часовник, што укажува на повисок социо-економски статус, што го отежнува екстраполирањето на резултатите на пошироката популација.
Зошто менструацијата започнува порано?
Што предизвикува порана менструација и зошто е потребно подолго време за да стане редовна? Факторите кои придонесуваат за ова се различни. Авторите на студијата укажуваат на повисок индекс на телесна маса (БМИ), и иако ова може да биде еден фактор, тој не е единствениот.
„Авторите забележуваат дека пониската возраст на менарха се случила пред населението да ја зголеми стапката на обезност. Ова укажува дека вообичаениот наратив дека обезноста е движечки фактор, е премногу поедноставен“, вели епидемиологот Лорен Хотон од Одделот за јавно здравје на Универзитетот Колумбија.
Наместо тоа, тврди д-р Хотон, тоа би можело да биде поврзано со стресот.
„Многу е веројатно дека БМИ и стресот меѓусебно делуваат за да ја забрзаат менархата и да ја продолжат редовноста на циклусот. Мојата работна хипотеза е дека повеќе стрес го зголемува количеството на андрогени, а повеќе масно ткиво го претвора изобилството на андрогени во естроген, што доведува до поран пубертет“, објаснува.
Социо-економските и еколошките фактори исто така може да бидат во игра: вклучително и изложеност на хемикалии кои го нарушуваат ендокриниот систем, како и психосоцијални фактори и системски бариери со кои често се соочуваат луѓето од другите раси. Јасно е дека се потребни повеќе истражувања за да се истражат факторите кои стојат зад почетокот на менструацијата. Како што знаеме, здравјето на жените и менструалното здравје се значително недоволно финансирани области на студии.
