Ковид-19 е првенствено респираторно заболување кое предизвикува респираторни проблеми, но може да зафати и други делови од телото. Лекарите откриле дека Ковид-19 може да влијае и на белите дробови, срцето, но и на дигестивниот систем.
Според статистичките податоци, кај 53% од пациентите со Ковид-19 се развива барем еден гастроинтестинален симптом. Покрај тоа, кај некои пациенти гастроинтестиналните симптоми може да се појават уште во раната фаза на болеста, а кај некои пациенти тие се единствениот индикатор за инфекција. Постојат неколку вообичаени знаци кои покажуваат дека Ковид-19 влијаел на дигестивниот систем.
Губење на апетит
Некои луѓе кои страдаат од Ковид-19 пријавиле губење на апетит. Невообичаено губење на апетит може да биде показател за инфекција. Јадењето здрава храна е клучно за закрепнување од болест, а губењето апетит може да го забави закрепнувањето и да предизвика слабеење.
За да се избегне ова, експертите препорачуваат пациентите да јадат храна која е богата со енергија и протеини и која помага во зајакнување на имунолошкиот одговор.
Грчеви
Дел од пациентите пријавиле грчеви и болки во стомакот како симптоми на коронавирус. Абдоминална болка може да биде предизвикана од какво било активно воспаление или цревна инфекција. Покрај тоа, може да се јави и кога вирусот го напаѓа чувствителниот дигестивен тракт.
Според статистичките податоци, кај 53% од пациентите со Ковид-19 се развива барем еден гастроинтестинален симптом
Гадење и дијареја
Овие симптоми обично се јавуваат во почетната фаза на болеста. Во случаи на сериозна инфекција, некои пациенти исто така може да повраќаат крв и потребна им е итна медицинска помош. Дијарејата може да биде показател за умерена или тешка форма на болеста.
Губење на мирис и вкус
Ова е еден од симптомите кои се карактеристични за Ковид-19, а може да биде показател за гастроинтестинални проблеми предизвикани од вирусот, пишува „Тајмс оф Индија“. Покрај тоа, губењето на мирис и вкус може да доведе и до губење на апетит, што може дополнително да влијае на варењето и закрепнувањето.
Освен тоа, вирусна инфекција може да предизвика губење на килограмите, а може негативно да влијае на метаболизмот, што може да го наруши закрепнувањето и да го ослаби имунолошкиот одговор.
