НОВА ЕВРОПСКА СТУДИЈА: Децата главно заболуваат од лесна форма на КОВИД-19

Истражување кое опфатило околу 600 деца од цела Европа, покажува дека најмладите имаат блага форма на болеста, починале четворица од следените пациенти.

Медицинските студии во Европа за деца заболени од КОВИД-19 се ретки. Починати се четири од 582 деца, од кои две имале пропратни болести. Симптомите генерално се лесни и благи, а одредени деца кои се тестирале на коронавирус не ги манифестирале. Меѓутоа, едно од десет деца завршиле на интензивна нега.

Лекарите велат дека студијата влева надеж, но дека научниците треба да пронајдат најадекватна терапија за децата кои развиваат најтешка форма на болеста.

ШТО ПОКАЖУВА СТУДИЈАТА?

Тимот истражувачи, предводен од научниците од Институтот при детската болница Great Ormond Street во Лондон, ја следел состојбата кај 582 деца на возраст од 3 до 18 години од 25 европски земји.

Сите овие деца имале позитивен тест на КОВИД-19 во пикот на епидемијата во април. Една четвртина од нив имале пропратни здравствени проблеми.

Меѓу четирите починати деца, ниту едно не било помладо од 10 години, а две од нив имале и други болести. Повеќе од половина од децата опфатени во студијата биле на болничко лекување, додека 8% завршиле на интензивна нега.

КАКВИ СИМПТОМИ ИМАЛЕ ДЕЦАТА?

Децата најчесто имале треска (65%), инфекција на горниот дел на респираторниот тракт (54%), воспаление на белите дробови (25%) и гастроинтестинални симптоми (22%).

Одредени деца (16%) кои генерално биле тестирани бидејќи биле во контакт со заразено лице, не покажувале никакви симптоми.

КАКВИ СЕ ПОСЛЕДИЦИТЕ?

Научниците истакнуваат дека стапката на смртност меѓу децата “значајно пониска“ отколку што покажува студијата, со оглед на тоа дека одредени деца, кај кои се појавиле благи симптоми, се уште не биле тестирани за време на студијата. Тие додаваат дека е потребно да се соберат уште податоци, за да им се помогне на лекарите во изборот на најдобра терапија за деца кои ќе заболат од КОВИД-19.

Д-р Марк Тебруг вели дека кај повеќето деца и млади е забележана само блага форма на болеста.

“Сепак, незанемарлив број деца имаа тешка форма на КОВИД-19, на кои им беше потребна интензивна нега. Тоа треба да се земе предвид при планирање и одредување на приоритетите на здравствените ресурси при понатамошниот развој на пандемијата“, вели тој.

Истражувањето е објавено во стручното списание The Lancet Child and Adolescent Health journal.