Повеќе од пет симптоми во првата недела на инфекција со SARS-CoV-2 носат зголемен ризик од долг Ковид

Ниту благите симптоми на Ковид-19 за време на акутната фаза на болеста не спречиле појава на долготрајно заболување

ФОТО: Unsplash

Новиот извештај покажува дека луѓето кои имаат повеќе од пет симптоми во текот на првата недела од инфекцијата со вирусот SARS-CoV-2, имаат зголемен ризик од развој на долг Ковид. Возраста, полот, коморбидитетите и хоспитализацијата во текот на почетната фаза на болеста, исто така, влијаеле на предвидување на развојот на оваа форма на болеста. Поединците со долг Ковид имале зголемен ризик од кардиоваскуларни и респираторни абнормалности.

Хоспитализацијата и потребата за кислород се исто така поврзани со зголемен ризик од развој на долг Ковид

Долг Ковид

Долгиот Ковид подразбира дека симптомите на болеста траат подолго од четири недели од почетната инфекција. Кај некои луѓе, симптомите траат со месеци. Луѓето со оваа состојба можат да доживеат долготрајно заболување, без оглед на сериозноста на симптомите за време на акутната фаза на инфекцијата. Иако симптомите варираат од личност до личност, вообичаените симптоми на долг Ковид вклучуваат замор, болки во мускулите, главоболки и депресија.

Приближно едно од пет лица обично има симптоми на Ковид-19 после 5 недели. Покрај тоа, овие симптоми траат и по 12 недели кај околу 10% од сите заразени со вирусот SARS-CoV-2.

Иако симптомите варираат од личност до личност, вообичаените симптоми на долг Ковид вклучуваат замор, болки во мускулите, главоболки и депресија

Истражувачите анализираа 27 претходно објавени студии кои се занимавале со долгиот Ковид и ги истакнаа најчестите симптоми. Коавторот на студијата, Шамил Харун, изјави за „Medical News Today“ дека нивниот извештај им овозможил да ги комбинираат резултатите од другите студии, што помогнало да откријат цела низа симптоми поврзани со долгиот Ковид и да ги идентификуваат симптомите кои се јавуваат најчесто, но исто така и да идентификуваат кои симптоми можат да предвидат долг Ковид.

Извештајот е објавен во часописот „Journal of the Royal Society of Medicine“.

Симптоми и индикатори на долг Ковид

Истражувачите откриле дека најчестите симптоми вклучуваат замор, отежнато дишење, болки во мускулите, главоболки, нарушувања на сетилата за вкус и мирис. Покрај тоа, истражувачите ги проучувале и нарушувањата во спиењето и когнитивните симптоми како што се проблеми со меморијата и концентрацијата.

Се покажало дека лесните симптоми на Ковид за време на акутната фаза на болеста сеедно не спречиле појава на долготрајно заболување. Хоспитализацијата и потребата за кислород биле поврзани со зголемен ризик од развој на долг Ковид.

Една студија, исто така, покажала дека ризикот од развој на долг Ковид е зголемен кај луѓе кои имале повеќе од пет симптоми во текот на првата недела од инфекцијата. Другите фактори поврзани со зголемен ризик од развој на долг Ковид вклучуваат постара возраст, женски пол и веќе постоечки здравствени состојби.