Што знаеме за новиот, њујоршки сој на коронавирус што се појави во Хрватска: Загрижувачка мутација што може да ја ослаби ефикасноста на вакцините

За њујоршкиот сој се знае малку, освен дека се шири побрзо и дека присуството на тој сој во Њујорк расте

Новите варијанти треба да бидат сфатени многу сериозно, вели д-р Ентони Фаучи, познатиот американски имунолог и главен медицински советник на американскиот претседател Џо Бајден

Хрватските здравствени власти објавија дека во земјата, покрај 60 случаи на британскиот сој на коронавирус и три случаи на јужноафриканскиот сој, откриени се и два случаи на нов сој – њујоршки сој.

„За њујоршкиот сој, за кој информациите се појавија кон крајот на минатата недела, се знае малку, освен дека се шири побрзо и дека присуството на тој сој во Њујорк расте“, изјави Крунослав Чапак, директор на ХЗЈЗ.

Но, она што е досега познато дава одредена причина за загриженост. Овој нов сој на коронавирус, наречен B.1.526, забрзо се шири низ Њујорк и околината, а носи загрижувачка мутација што може да ја ослаби ефикасноста на вакцините, според сознанијата на два истражувачки тима, пишува „Њујорк тајмс“.

Њујоршкиот сој првпат се појави во примероците за тестирање и секвенционирање собрани во градот, по кој беше и именуван, уште во ноември минатата година. До средината на минатиот месец, на овој сој отпаѓаа дури 27% од низата на вируси во Њујорк во базата на податоци за различни соеви на коронавирус.

Овој нов сој на коронавирус, наречен B.1.526, забрзо се шири низ Њујорк и околината, а носи загрижувачка мутација што може да ја ослаби ефикасноста на вакцината, според сознанијата на два истражувачки тима, пишува „Њујорк тајмс“

Една студија за новиот сој беше спроведена од група истражувачи на Калифорнискиот институт за технологија (Калтек), додека друга беше спроведена од истражувачите од Универзитетот Колумбија. Ниту една од нив сè уште не поминала стручна рецензија, ниту е објавена во научно списание, но резултатите се совпаѓаат и сугерираат дека ширењето на новиот сој е реално, велат експертите.

„Ова не се баш среќни вести. Но, добро е да знаеме за тоа, бидејќи тогаш можеби можеме и да сториме нешто во врска со тоа“, вели имунологот Мишел Нусенцвајг од Универзитетот Рокфелер, кој не беше вклучен во студиите.

Ентони Фаучи, познат американски имунолог и главен медицински советник на американскиот претседател Џо Бајден, вели дека новите варијанти треба да бидат сфатени „многу сериозно“, но дека жителите на Њујорк не треба да „очајуваат“ поради сојот откриен во нивниот град затоа што вакцината и понатаму ќе продолжи да обезбедува одредена заштита.

„Ако добиете добра вакцина која има висок титар на антитела, можеби нема да добиете најдобар можен одговор, но и понатаму ќе биде во опсег во кој е ефикасна, што ни кажува да не очајуваме поради фактот дека имаме нови варијанти“, рече д-р Фаучи во интервју за „Си-Ен-Ен“.

Д-р Мишел Нусенцвајг напоменува дека луѓето кои прележале Ковид-19 или оние кои се вакцинирани „многу веројатно ќе бидат во состојба да се изборат со оваа варијанта“, но и дека „би можеле лесно да се разболат“. Во исто време, тие би можеле да заразат други и со тоа да го одложат постигнувањето на колективен имунитет.