СТУДИЈА: Немањето симптоми кај заразените со омикрон го објаснува неговото ширење

Прелиминарните наоди од две јужноафрикански клинички студии покажуваат дека омикрон варијантата на коронавирусот има многу повисока стапка на “асимптоматски пренос“ од претходните варијанти на коронавирусот, што би можело да објасни зошто толку брзо се прошири во светот.

Студии, од кои едната е спроведена минатиот месец кога инфекциите со омикрон биле во пораст во Јужна Африка, а друга која во исто време повторно земала примероци од претходно тестирани испитаници, откриле многу поголем број лица кои биле позитивни на коронавирус, а не покажувале симптоми во споредба со претходни испитувања.

Во Убунту студијата што ја оценува ефикасноста на Модерна вакцината против КОВИД-19 кај лица кои живеат со ХИВ, 31% од 230 учесници кои биле подложени на скрининг, биле позитивни, а сите 56 примерови достапни за анализа на секвенцирање, потврдени се како зараза со омикрон.

“Ова е во оштра спротивност со стапката на позитивност пред омикрон, која се движеше од помалку од 1 процент до 2,4 проценти“, стои во соопштението на научниците.

Во подгрупа на студијата Сисонке која ја проценува ефективноста на Џонсон и Џонсон вакцината против КОВИД-19, просечната стапка на асимптоматско пренесување се зголемила на 16 проценти за време на периодот омикрон од 2,6 проценти од времето кога доминирале бета и делта варијантите.

“Студијата Сисонке опфати 577 испитаници кои се претходно вакцинирани, даде резултати што укажуваат на висока стапка на пренос на заразата дури и кај оние за кои се знае дека биле вакцинирани“, велат истражувачите. Тие додаваат дека “повисоката стапка на асимптоматско пренесување е веројатно главниот фактор за брзото ширење на варијантата омикрон, дури и меѓу популациите со високи претходни стапки на инфекција со коронавирус“.

Јужна Африка бележи зголемување на инфекциите со коронавирус од крајот на ноември, приближн во времето кога нејзините научници го предупредија светот за омикрон.

Но, оттогаш новите случаи се во опаѓање.

Првите показатели говореа дека новиот бран на зараза е одбележан со помалку тешки форми на болеста од претходните.