Вакцинацијата против КОВИД-19, односно коронавирус штити од потешки симптоми на болеста, а се покажало и дека нема да им наштети на бремените жени или на бебето. Некои лекари дури и ја препорачуваат оваа вакцинација на трудниците, жените кои се обидуваат да забременат и на доилките. Значи, вакцинацијата против коронавирус во бременоста е целосно безбедна и има одредени предности.
Кои вакцини се дозволени во бременоста?
Бремените жени можат да се вакцинираат против грип во сезоната на грип, како и против тетанус, дифтерија, хепатитис Б, беснило и против КОВИД. На овој начин трудницата и бебето ќе бидат заштитени. Од друга страна, во бременоста важно е да се избегнуваат вакцини кои содржат живи вируси бидејќи таквите вакцини можат да влијаат на развојот на бебето. Тука спаѓаат вакцините против варичела, морбили, заушки, туберкулоза, жолта треска и рубеола.
КОРОНАВИРУС И БРЕМЕНОСТ
Коронавирусот во бременоста може да се препознае по бројни симптоми како што се:
- Кашлица
- Зголемена телесна температура
- Отежнато дишење
- Губење на вкус и мирис
- Болка во мускулите и зглобовите
- Замор
- Воспаление на белите дробови
Се покажа дека коронавирусот може да биде опасен за бремената жена, како и за бебето, а забележани се и повеќе компликации од коронавирусот кај трудниците, отколку кај други жени.
Вирусот може да влијае на развојот на бременоста и развојот на детето. Бремените жени кои ќе се заразат со коронавирус ќе имаат повеќе компликации од другите жени и во некои случаи ќе треба да бидат хоспитализирани. Бремените жени на возраст над 35 години, со прекумерна телесна тежина или оние со други состојби или болести како што се дијабетес или хипертензија (висок крвен притисок) се изложени на поголем ризик да развијат потешки случаи на коронавирус. Во некои случаи, КОВИД-19 може да ја зголеми шансата за предвремено раѓање.
Вакцинација против КОВИД-19 во бременоста
Се повеќе истражувања покажуваат дека вакцинацијата против КОВИД во бременоста е сосема безбедна, а во некои случаи и пожелна. Вакцинацијата за време на бременоста ја намалува можноста за заразување со КОВИД, го намалува ризикот од тешки симптоми на болеста, а исто така се создаваат и антитела кои се пренесуваат на фетусот преку плацентата и го штитат неколку недели по раѓањето.
