Педијатрите до неодамна препорачуваа внесување на месото во исхраната на бебето дури во седмиот месец, но нови истражувања покажуваат дека месото треба да биде едно од првите намирници со кои се почнува при преминот на цврста храна. Педијатриското списание за гастроентерологија и исхрана пренесува истражување кое препорачува внесување месо во бебешката исхрана уште од првите кашички, бидејќи месото, меѓу другото, е важен извор на протиени, витамин Б12 и железо.
Во првата година од животот на детето се потребни повеќе витамини и железо за да расте и правилно да се развива.
Намирница која најдобро ги задоволува овие потреби е токму месото. Многу педијатри не го ограничуваат начинот на подготовка, па на детето може да му се понуди месо од купечка каша (да се почне со една лажичка, за да до седмиот месец се стигне до цела тегличка), или свежо купено и приготвено месо (во овој случај се започнува со 40 грама свежо месо кое се готви на пареа и се блендира со зеленчук).
Протеини за раст
Протеините се цигли на организмот, бидејќи преставуваат основен елемент за изградба и одржување на сите клетки, на внатрешните ткива и мускулите. Протеините од месото, како и другите протеини од животинско потекло се нарекуваат комплетни, бидејќи ги содржат сите аминокиселини кои организмот не може сам да ги произведе, па треба да се внесат преку исхраната. На детето може да му се даде и бело и црвено месо бидејќи количината на протеини е многу слична, со таа предност што белото месо е полесно за варење и има малку повисок процент. Но, имајте на ум дека месото е високопротеинска исхрана и ако е дадена во преголеми количини може да ги оптерети бубрезите на бебето.
Од оваа причина се препорачува редовно давање на мали количини месо во комбинација со зеленчук.
Железо за крвта
Железото е основно бидејќи на организмот му е потребен хемоглобин за транспорт на кислородот од крвта и за резерви во мускулите, за респираторната активност и делбата на клетките, како и за изградба на структурата и органите. Железото е исто така важно и за формирањето на црвените крвни зрнца. Детето по основ на својата телесна тежина има потреба за поголема количина на железо од возрасното лице бидејќи неговиот организам е во развој.
Таа потреба најдобро се задоволува преку месото бидејќи железото од животинско потекло полесно се асимилира откоклу тоа од билките.
Витамини од Б групата за целиот организам
Витаминот Б12 присутен во месото го штити нервниот систем, учествува во производството на црвени крвни зрнца, го стимулира апетитот и ја поттикнува асимилацијата на протеини, јаглехидрати и витамини претворајќи ги во енергија што допринесува за нормален развој. Освен Б12, месото содржи и витамини Б1 и Б6.
