ЖИТАРКИ во детската исхрана и се што треба да знаете за нив (1)

Житарките претставуваат нутритивно вредна храна.

Комплексните јаглехидрати се составен дел од житарките. Јаглехидратите од интегралните житарки бавно се разложуваат, бавно го подигаат шеќерот во крвта и затоа доведуваат до постојан доток на енергија. Исто така, содржат и протеини, но поради помалата биолошка вредност на протеините, житарките е пожелно да се комбинираат со легуменози.

Производите од интегрално зрно житарки богати се со диететски влакна, кои поттикнуваат работа на цревата. Содржината на масти е минмална, а заситени масни киселини не се присутни.

Житарките од цело зрно (интегрални житарки) се многу покорисни од преработените, поради изобилството на витамини од Б групата во својот состав и се одличен оброк за појадок!

ПРЕПОРАЧАНИ ЖИТАРКИ:

  • Пченка (палента) 5+
  • Просо 6+
  • Интегрален ориз 6+
  • Киноа 6+
  • Елда 7+
  • Овес 7+
  • Амарант 7+
  • Пченица 7+
  • Спелта 7+
  • Јачмен 8+
  • ‘Рж 8+
♦♦♦♦ Пченката, белиот ориз и просото имаат поголем гликемиски индекс, па мора да се води сметка за внесената количина.

ЕЛДА

Елдата најчесто се консумира во зима, оти зајакнува, загрева и лекува. Иако елдата не е житарка, таа во себе ги содржи сите оние добри страни кои ги имаат интегралните житарки. А, во неа има супстанци и она што на повеќето житарки им недостасува. Таа е богата со есенцијалната аминокиселина – лизин, која главно ја нема во житарките.

Зрното од елда содржи протеини, масти, јаглехидрати, минерали, растителни влакна, витамини (особено витамин Е), калиум, фософор, железо, магнезиум, селен, и речиси сите витамини од Б групата.

Таа е одличен извор за појадок за децата и за бебињата. Понудете му ја на вашето бебе по седмиот месец, а подгответе ја на следниов начин:

  • Добро измиената елда ставете ја во тенџере со вода, во однос елда и вода 1:3. Оставете да врие на тивок оган околу 15 минути. Кога елдата ќе омекне, тргнете ја од оган и оставете ја затворена да се смири. Изгмечете ја со вилушка или изблендирајте ја да се направи каша.
♦♦♦♦ Во наредното продолжение:  Се за јачменот и киноата