Откако ќе се вратат на работи, многу мајки ги мачи чувство на вина поради тоа што никако не успеваат да ги избалансираат деловниот и приватниот живот. Без оглед на тоа дали се дома или на работа, тие постојано се чувствуваат како да се на погрешно место.
Ситуацијата во која се наоѓаат вработените мајки најдобро ја опишува новинарката Ејми Вестервелт во книгата “Заборави дека мора да имаш се“.
“Од жените очекуваме да работат како да немаат деца и да ги воспитуваат децата како да не работат“, пишува Вестервелт.
На многу жени им е тешко да го балансираат приватниот и деловниот живот, особено денес кога границите на работното време се поместени и се “прелеваат“ во времето кое жените би требало да го поминуваат со семејството.
Но, и кога ќе дојдат дома, многу мајки не можат целосно да им се посветат на децата. Често се фаќаат како со “половина уво“ ги слушаат што им зборуваат децата за тоа што правеле тој ден, што може да ги наведе на заклучок дека не се добри мајки.
Но, жените не се чувствуваат виновни само затоа што мислат дека ги изневеруваат своите деца или нивниот шеф. Многумина во исто време се чувствуваат виновни што немаат време за себе или што не им помагаат доволно на своите постари родители.
Психологот Шерил Зиглер им советува на жените што побрзо да поработат на чувството на вина кое влијае на нивното расположение, им го нарушува сонот и поради кое, на крајот на денот, се во постојан стрес.
Ова се пет нејзини совети како да постигнете баланс и да се ослободите од чувството на вина:
ПРОСТЕТЕ СИ СЕБЕСИ!
За да се ослободите од чувството на вина, треба да престанете да се ‘јадете’ поради вашите избори и околности. Емоционално е болно постојано да се чувствувате како лоша мајка, лоша вработена или лоша пријателка. Наместо тоа, сетете се на причините кои стојат зад вашите избори. Секој пат кога ќе помислите во себе: “Се чувствувам лошо поради…“, кажете си: „Ова го одлучив затоа што…“.
СЕТЕТЕ СЕ НА ВАШИТЕ ВРЕДНОСТИ
Една од најдобрите вежби за мајките кои се чувствуваат виновни поради одлуките поврзани со семејните односи и воспитување деца, или затоа што поминуваат премногу време на работа, е да размислат кои се нивните приоритети и животни вредности и потоа да живеат во склад со нив. Често луѓето велат дека нешто им е многу важно, но не живеат во склад со тоа.
На пример, ако за вас е најважно времето поминато со семејството, а во исто време мислите дека не поминувате доволно време со семејството, ослободете се од вината така што ќе најдете повеќе време за семејството. Вежбајте да кажувате „не“ на непотребните обврски. Вклучете ги вашите деца во задачите што секогаш вие ги извршувате. Веројатно ќе треба да поставите јасни граници и во останатите подрачја од животот и постојано да се потсетувате дека семејството ви е најважно. Само тогаш она што го правите ќе биде во согласност со она што го сакате.
ПОБАРАЈТЕ ПОМОШ
За многу жени, една од најтешките работи е барањето помош. Наместо да бараат помош, вработените мајки само го подгреваат својот стрес обидувајќи се да направат сè сами. И тогаш сфаќаат дека тоа е едноставно невозможно.
Барањето помош бара пракса, но штом еднап ќе почнете, брзо ќе увидите дека не мора да се чувствувате лошо што барате помош, особено ако тоа стане взаемен однос во кој сите ќе “профитираат“.
СЕКОГАШ БИДЕТЕ ЕМОЦИОНАЛНО ПРИСУТНИ
Научникот Џон Боулби открил дека за здрав однос родител-дете, исклучително е важно вие како родител да сте секогаш емотивно присутни. Детето треба да се утеши кога е потребно, исто како што треба да му се покаже дека сте среќни кога ќе го видите.
Притоа, треба да ја спуштите скалата на очекувања од совршената мајка која може да направи се, и која прави се што мисли дека треба да прави, на ниво на мајка која истовремено се грижи и за себе. Важно е да сфатите дека не мора да бидете совршена мајка и дека ќе имате добар однос со вашите деца дури и ако сте “само“ добра мајка.
ПРЕСТАНЕТЕ НА СОЦИЈАЛНИТЕ МРЕЖИ ДА СЛЕДИТЕ “ИДЕАЛНИ“ МАЈКИ
Самото гледање семејни фотографии споделени од други жени на социјалните платформи како Фејсбук и Инстаграм може да ја фрли вработената мајка во очај. Времето што го поминувате на социјалните мрежи не треба да резултира со лоши емоции. Ако се чувствувате лошо поради објавите на другите луѓе, престанете да ги следите. Да се ослободите од вината не значи дека не сте грижлива мајка полна со љубов.
