ДВЕГОДИШНО ДЕТЕ СТАВЕНО НА РЕСПИРАТОР: Нискиот ризик од тежок Ковид-19 кај децата не е еднаков на никаков ризик, предупредуваат докторите

Иако тешката болест поради Ковид-19 останува невообичаена кај децата, според податоците, велат медицинските експерти од САД, случаи како Адријан Џејмс (2) докажуваат дека и малите деца навистина се разболуваат од вирусот

Првиот симптом на двегодишното момченце бил блага кашлица/ФОТО: Тифани Џексон

Адријан Џејмс е едно од повеќе од 320.000 деца дијагностицирани со Ковид-19 во САД во изминатите две недели, според федералните податоци.

Двегодишното момче од Маунт Вернон, Илиноис, се соочи со тешки компликации од вирусот, вклучувајќи и скоро двонеделен престој во болница, од кои пет дена беше одржуван во живот на апарат за механичка вентилација (респиратор), раскажа неговата мајка Тифани Џексон за GMA.

  • „Во еден момент искрено не знаев дали ќе успее или не, бидејќи му требаше долго време да покаже знаци на подобрување“, рече Џексон за „Добро утро Америка“, додавајќи дека првиот симптом на нејзиниот син бил блага кашлица. „Бев толку исплашена“

Според Џексон, Адријан, кој исто така развил пневмонија додека се борел со вирусот, бил отпуштен од болница во понеделникот.

Адријан продолжува добро да се опоравува, но ќе мора да се врати во болница за шест недели за да ги провери белите дробови

Детето продолжува добро да се опоравува, но ќе мора да се врати во болница за шест недели за да ги провери белите дробови, објаснува неговата мајка, која рече дека никој друг во нејзиното семејство немал симптоми на Ковид-19 во времето кога Адријан бил позитивен на вирусот.

„Искрено, немам идеја од каде го добил вирусот“, рече Џексон, која се грижела за Адријан дома цело време. „За мене беше изненадување: да е толку млад и да се разболи“.

ААП: Минатата недела 25% од пријавените неделни случаи на Ковид-19 во САД биле деца

Минатата недела, децата учествуваа со речиси 25% од пријавените неделни случаи на Ковид-19 во САД, според неделниот извештај објавен во понеделникот од Американската академија за педијатрија и Children’s Hospital Association.

„Кога започна пандемијата сите зборувавме за тоа како ова е толку чуден вирус што навистина ја таргетира постарата популација и децата беа во голема мера заштитени од каква било значајна болест“, рече д-р Марија Странд, главен лекар во детската болница „SSM Health Cardinal Glennon“ во Сент Луис, Мисури, каде што се лекуваше Адријан.

„Сега она што го гледаме со делта варијантата… – не само што децата се разболуваат од Ковид, туку тие сигнификантно се разболуваат од Ковид. Претходно не гледавме значителни инфекции кај децата под 2 години, но сега имаме бебиња во нашата болница со сигнификантна болест“, рече таа.

Во отсуство на кристална топка што ни кажува кои деца ќе имаат тежок Ковид, а кои деца нема да имаат, може да биде навистина тешко од аспект на родител

Случаи како Адријан докажуваат дека малите деца навистина се разболуваат од вирусот

Иако тешката болест поради Ковид-19 останува невообичаена кај децата, според податоците, велат медицинските експерти, и случаи како Адријан докажуваат, дека малите деца навистина се разболуваат од вирусот.

„Мислам дека тоа е она што многу луѓе навистина го загубиле од вид, дека нискиот ризик не е еднаков на никаков ризик“, вели д-р Ејми Едвардс, специјалист за детски инфективни болести во „University Hospitals Rainbow Babies & Children’s Hospital“ во Охајо. „Додека ние знаеме, се разбира дека мнозинството мали деца кои добиваат Ковид ќе се справат добро со вирусот, тоа не е универзално правило“.

„Во отсуство на кристална топка што ни кажува кои деца ќе имаат тежок Ковид, а кои деца нема да имаат, може да биде навистина тешко од аспект на родител“, рече д-р Едвардс, мајка на 2-годишен син и 4-годишна ќерка.

Како што децата на возраст од 5 до 11 години им се приближуваат на условите за вакцина против Ковид-19, најверојатно во почетокот на ноември, задачата стана особено тешка за родителите на деца помлади од петгодишна возраст.

Децата од таа возрасна група ќе бидат последните од популацијата подобна за вакцинација. (Good Morning America)