Регулаторната агенција за лекови на Европската унија вчера изрази сомнеж за потребата за четврта доза вакцина против КОВИД-19, нагласувајќи дека во моментов нема податоци кои го поткрепуваат овој пристап, бидејќи се потребни повеќе информации за брзоширечката омикрон варијанта.
“Додека користењето на дополнителни бустер дози може да биде дел од резервните планови, повторени вакцинации во куси интервали не би претставувале одржлива долгорочна стратегија“, изјави Марко Кавалери, раководител на стратегијата за вакцинација при Европската агенција за лекови (ЕМА).
Тој изрази загриженост дека стратегијата за давање бустер доза на секои четири месеци потенцијално претставува ризик од преоптоварување на имуниот систем и дека може да доведе до замор кај населението.
Кавалери исто така изјави дека се потребни повеќе податоци за ефектот на новите варијанти на вакцините и подобро сфаќање на еволуцијата на моменталниот бран, како би се донела одлука дали е потребна вакцина посебна за омикрон.
“Важно е дека постои добра дискусија за изборот на составот на вакцините за да се погрижиме дека имаме стратегија што не е само реактивна и да се обидеме да дојдеме до соодветниот пристап за да спречиме идна варијанта“, доаде тој.
ЕМА соопшти дека во моментов се разговара со производителите на вакцини во случај да биде потребна ажурирана вакцина, но додаде дека секоја промена од тој тип треба да се координира на глобално ниво.
