Бројот на деца заболени од коронавирус во Индонезија е скоро тројно зголемен од мај, а смртноста кај новороденчињата од Ковид-19 нагло се зголеми во земјата која се бори со досега најтешкиот бран на зараза, изјави Аман Пулунган, водечки индонезиски педијатар.
Луѓето сè уште веруваат дека децата не можат да страдаат и да умрат од Ковид. Нивото на свест е ниско, предупреди водечкиот индонезиски педијатар Аман Пулунган
Во јуни Индонезија забележа нагол пораст на инфекции со коронавирус, вклучително и нови рекорди. Претседателот на индонезиското Здружение на педијатри, Аман Пулунган, рече дека неделниот број на смртни случаи од Ковид-19 кај децата минатата недела се искачил на 24 од 13, колку што изнесувал една недела претходно, а многу жртви се помлади од 5 години.
Д-р Аман вели дека инфекцијата брзо се шири меѓу малолетниците.
„Инфекцијата се шири. Во средината на мај, имаше околу 2.000 до 2.500 случаи неделно “, рече Аман. „Минатата недела забележавме повеќе од 6.000 нови инфекции.“
Според официјалните податоци, процентот на вкупниот број на пациенти на возраст под 18 години во јуни се искачил на 12,6 проценти во споредба со јули минатата година кога тој бил 5 проценти. Аман, сепак, истакнува дека децата сега повеќе се тестираат.
Индонезискиот претседател Јоко Видодо неделава објави дека властите одобриле вакцинација на деца од 12 до 17 години со кинеската вакцина „Синовак“.
-
Д-р Аман вели дека педијатрите веќе откриваат случаи на долг-Ковид: исцрпувачки и долготрајни симптоми кои траат со месеци
Зголемувањето на бројот на новоинфицирани деца Аман повеќе му го припишува на заморот од пандемијата и недостатокот на знаење отколку на влијанието на преносливите варијанти на вирусот.
„Не станува збор за делта сојот, туку за системот. Помалку тестирања, помалку следења. Луѓето сè уште веруваат дека децата не можат да страдаат и да умрат од Ковид. Нивото на свест е ниско“, предупреди индонезискиот педијатар, а пренесува „Хина“.
