НАГЛА ПРОМЕНА ВО ОДНЕСУВАЊЕТО: Зошто вашето дете одеднаш се однесува како бебе?

Родителите кои имаат дете на возраст помеѓу две и три години сигурно знаат дека нивното дете одеднаш повторно сака да биде бебе.

Двегодишните и тригодишните деца се менуваат со голема брзина и нивниот развоен пат е фасцинантен. Понекогаш и за нив ова е застрашувачко и исцрпувачко, па не зачудува што во одредени периоди повторно сакаат да бидат несамостојни бебиња. Таквите однесувања се сосема вообичаени и не треба да ве плашат.

  • Очекувате ли премногу од вашето дете?

На оваа возраст, почнува да се развива сеќавањето кај детето, па можно е да се присетува на некои делови од неговото поранешно детство во кои му било посветено големо внимание. Децата исто така сакаат да се преправаат дека се деца бидејќи тоа им е забавно, вели психологот Сузане Ајерс Денам.

Постои можност детето вака да реагира на голема промена во рутината или животот. Доколку во семејството неодамна пристигнала принова, детето тргнало во градинка, сте се преселиле или имате проблеми во односот со партнерот, регресијата во однесувањето може да биде начин за справување со ситуацијата. Ако е така, посветете му на детето уште поголема нежност и внимание.

Преправајќи се повторно дека е бебе, вашето дете можеби се обидува да ви каже дека очекувате премногу од него и дека сè уште не е подготвено да биде големо дете. Во такви ситуации, детето често повторно ќе посегне по шише или цуцла, па дури може да побара од вас да го нахраните.

Ако тоа се случи, не му кажувајте дека ова однесување е само за бебиња. Понекогаш дозволете му да направи нешто што сака,а внимание секогаш придавајте на ситуациите во кои се однесувало во склад со годините и потоа пофалете го за вложениот труд.

  • Детето можеби само сака повеќе од вашето внимание

Ако регресијата на вашето дете се манифестира само во фактот дека му треба малку повеќе внимание, сака да биде блиску до вас и повеќе да се гушка, овозможете му го тоа бидејќи можеби на вашето дете едноставно му треба малку повеќе време со вас.

Веројатно најголемиот предизвик ќе биде справувањето со ваквото однесување пред другите. Ако вашето дете бара шише или цуцла пред баба и дедо кои мислат дека тоа е многу големо за тоа, објаснете им дека на сите понекогаш ни треба пауза од зрелоста и дека е во ред детето моментално да се однесува така,  тврди Ајерс Денам.