Симптомите кај децата, кога се зборува за КОВИД-19, најчесто се течење на нос, зголемена телесна температура, сува кашлица, дијареа, треска, повраќање, болка во стомакот, а кај адолесцентите, клиничката слика може да личи како кај возрасните: малаксаност, зголемена температура, сува кашлица, болка во градите, отежнато дишење, губење на осетот за мирис и за вкус.
Педијатарот ќе се посомнева дека се работи за КОВИД-19 на основа на позитивна епидемиолошка анкета или на крвната слика ќе се покажат некои пореметувања, а тоа најчесто се ниски леукоцити. Секако, како што велат тие, правила нема.
Според педијатарката д-р Билјана Лучиќ, постојат индикации кога родителите треба да се обратат кај педијатар.
“Упорна зголемена телесна температура која трае подолго од два дена, лоша општа состојба кај детето без оглед дали има или нема температура, раздразливост и нерасположение, кога детето одбива да внесува течност или оброк, упорна кашлица“, истакнува д-р Лучиќ.
Кога се работи за тоа кој е најдобриот начин да се подобри имунитетот кај децата, лекарите советуваат дека во нормални околности, доволно е детето да престојува на отворено, изложено на сончеви зраци.
“Важно е и да е физички активно, да спие доволно и да има пет оброци дневно (три главни и две ужини), со доволно зеленчук и овошје. Пожелно е внесот на витамини што повеќе да биде во свежа форма“, додава лекарката.
