Проф. д-р Владислав Вукомановиќ, детски кардиолог: Нешто се случува, новите соеви го зголемуваат бројот на болни деца од Ковид-19

Имаат покачена телесна температура, се жалат на главоболки, течење на носот, затнат нос, болки во зглобовите и мускулите, објаснува професорот по педијатрија на Медицинскиот факултет во Белград

Од Институтот за мајка и дете во Белград велат дека новите соеви на коронавирус го зголемуваат бројот на деца кои се разболуваат и дека децата кои се лекуваат во таа установа имаат тешки клинички слики, како кај возрасните. Нагласуваат дека ниту едно дете не било на апарат за дишење и дека претежно сите деца се пуштени дома целосно излечени.

Детскиот кардиолог од Институтот за мајка и дете, проф. д-р Владислав Вукомановиќ, вели дека нешто се случува и дека не може да не се забележи дека новите соеви на коронавирус го зголемуваат бројот на деца кои се разболуваат.

Проф. д-р Владислав Вукомановиќ, детски кардиолог

„Имаат покачена телесна температура, се жалат на главоболки, течење на носот, затнат нос, болки во зглобовите и мускулите. Симптоми кои во голема мерка се преклопуваат и со грипот и со короната, но најверојатно е зголемен бројот на деца кои се заразуваат со новиот сој на коронавирус“, изјави д-р Вукомановиќ за време на гостувањето на РТС.

Тој додаде дека ова е лоша вест и дека децата се преносители на болеста на своите баби, дедовци и родители, но дека добрата вест е што во Институтот за мајка и дете во Белград немаат згрижувања на тешко болни деца, односно дека нивниот број не е во пораст.

Доколку се појават симптоми на болеста и постои сомневање дека станува збор за инфекција со коронавирус, потребна е домашна изолација и детето да не се меша со другите членови на семејството

Д-р Вукомановиќ објаснува дека како и кај возрасните, така и кај децата кои имаат некои други болести, се јавува потешка клиничка слика на болеста.

„Пред се, кај деца со невролошки заболувања, хематолошки заболувања, вродени срцеви мани, имунодефициенции. Значи, потешки форми на болеста, но најтешка форма на болеста е мултисистемскиот воспалителен синдром, воспаление на сите органи и органски системи кај децата. Клиничката слика е многу тешка“, потенцира д-р Вукомановиќ.

Новите соеви на коронавирусот го зголемуваат бројот на деца кои се разболуваат од Ковид-19

„Бројот на тие деца не е голем. Но има потешки форми на болеста кои повеќе потсетуваат на симптоматологијата кај возрасните. Се манифестира, пред сè, со тешка пневмонија. Излекувањето е претежно целосно, освен ако не станува збор за деца со коморбидитет или некои сериозни невролошки или други болести“, вели Вукомановиќ.

Потешките форми на болеста повеќе потсетуваат на симптоматологијата кај возрасните

Тој додава дека е тешко, но не е невозможно децата да се натераат да ги применуваат превентивните мерки и да носат маски.

„Кај мене во амбуланта доаѓаат деца кои носат маска многу трпеливо. Деца од две години или нешто постари. Децата можат многу лесно да се насочат и воспитаат. Доколку се појават симптоми на болеста и постои сомневање дека станува збор за инфекција со коронавирус, потребна е домашна изолација и детето не треба да се меша со другите членови на семејството. Знаеме дека карантинот е 10 дена и тоа треба да се почитува“, потенцира докторот. (РТС)