Студии спроведени во САД и во некои европски земји покажале дека во училиштата во кои се практикува носење на заштитни маски, се внимава на одржување на физичко растојание и се применуваат останатите мерки на претпазливост, а не се спроведуваат спортски активности во затворени простори, не е воочено така брзо ширење на коронавирусот меѓу децата, објавија вчера истражувачите од Центарот за контрола и превенција на болести на САД (CDC).
Прашањето за ризикот од зараза со КОВИД-19 во училиштата и за тоа дали на децата треба да им се овозможи физичко присуство во училиште или да се продолжи со он-лајн настава, е жешка тема во многу земји.
И иако има докази за пренос на инфекцијата меѓу децата за време на физичкиот престој на настава во училиште, “достапните податоци собрани во текот на есенскиот училишен семестар покажале охрабрувачки резултати и укажуваат на можноста за враќање на учениците на настава во училиштата со придржување на сите пропишани мерки“, напишале стручњаците во написот објавен во списанието Journal of American Medical Association (JAMA).
“Со оглед на тоа дека многу училишта во некои делови во САД, но и на меѓународно ниво повторно се отворија, истражувачите евидентирале случаеви на инфекција со коронавирус на физичка настава, но малку се доказите кои упатуваат на тоа дека училиштата значајно придонеле за зголемен пренос на вирусот во заедницата“, објави CDC.
Студијата била спроведна во 17 основни и средни училишта во кои учениците и вработените строго се придржувале до насоките за носење заштитни маски. Се покажало дека инциденцата на инфекцијата со КОВИД-19 во тие училишѕа била 37 проценти пониска отколку во широката зедница, а меѓу вработените не е забележан ниту еден случај на зараза. Со коронавирус биле заразени исклучиво ученици, но не и наставници и останат возрасен персонал во училиштето.
“Со оглед на резултатите од студијата, се чини дека е малку веројатно дека возрасните лица, односно вработените во училиштето, со придржување на соодветните мерки, како физичка дистанца и носење маски, да се заразат со КОВИД-19 во училница“, вели главната авторка Ејми Фалк.
Научниците велат дека затворањето на училиштата може негативно да влијае на развојот на образованието на младите и нивното ментално здравје.
