Многумина од нас уживаат во топлото време, но кога температурите стануваат премногу високи, тоа може да претставува сериозен ризик за здравјето. Кога ќе настапи период на екстремна жештина, важно е да се заштитите себеси и луѓето околу вас. Главните ризици поврзани со топлотниот бран се:
- Недоволен внес на течности (дехидратација).
- Прегревање на организмот, што може да ги влоши симптомите кај луѓе кои веќе имаат срцеви или респираторни заболувања.
- Топлотна исцрпеност и топлотен удар.
Кој е најизложен на ризик?
Според британската Национална здравствена служба (NHS), топлотниот бран може да влијае на секого, но некои групи луѓе се особено ранливи, меѓу кои се:
- Постари лица, особено оние на возраст од 65 години и повеќе.
- Бебиња и мали деца на возраст до 5 години.
- Лица со сериозни хронични заболувања, како што се: срцеви заболувања, болести на дишните патишта, деменција, дијабетес, заболувања на бубрезите, Паркинсонова болест, проблеми со подвижноста, ментални нарушувања, зависност од дроги или алкохол.
- Лица кои живеат сами и можеби не се во состојба соодветно да се грижат за себе.
- Лица кои земаат повеќе лекови или лекови што можат да ја зголемат чувствителноста на високи температури.
- Лица кои веќе се болни и дехидрирани (на пример, поради дијареја или повраќање).
- Бездомници, како и луѓе кои работат или поминуваат многу време на отворено, особено ако се физички активни, како тркачи, велосипедисти и пешаци.
- Лица чија работа вклучува физички труд.
Сончевите зраци се најсилни помеѓу 11 и 15 часот. За време на топлотни бранови, обидете се децата да престојуваат во затворен простор или во сенка во овие часови. Планирајте игра на отворено рано наутро или доцна попладне, кога температурите се пониски. Доколку играат надвор, обезбедете редовни паузи во сенка
10 НАЧИНИ ДА ГИ ЗАШТИТИТЕ ДЕЦАТА ЗА ВРЕМЕ НА ЕКСТРЕМНИ ГОРЕШТИНИ
Децата се меѓу најранливите групи за време на топлотни бранови, бидејќи нивниот организам потешко ја регулира телесната температура отколку кај возрасните. Затоа е особено важно родителите да преземат мерки за нивна заштита.
- Чувајте ги бебињата помлади од шест месеци подалеку од директно сонце
Кожата на бебињата е исклучително нежна и може брзо да изгори. Секогаш држете ги бебињата помлади од шест месеци во сенка – без разлика дали сте дома, во двор или на прошетка.
Никогаш не оставајте бебиња, деца или домашни миленици сами во возило, дури ни за кратко!
Користете чадорче за количка. Никогаш не ја покривајте количката целосно со ќебенце или друга прекривка, бидејќи тоа може да создаде опасен „ефект на рерна“, при што топлината се задржува и температурата во количката значително се зголемува.
- Нанесувајте крем за сончање редовно и во доволна количина
За деца постари од шест месеци користете крем за сончање со најмалку SPF 30 и висока UVA-заштита. Кремот треба да се нанесе околу 30 минути пред излегување надвор и повторно на секои два часа, како и веднаш по пливање или потење. Не заборавајте на местата што често се пропуштаат, како ушите, стапалата, задниот дел од колената и рацете.
- Облекувајте ги децата во лесна и широка облека
Избирајте лесни ткаенини во светли бои кои ѝ овозможуваат на кожата да дише и ја одбиваат, наместо да ја впиваат топлината. Широката облека овозможува подобра циркулација на воздухот околу телото и помага децата да останат посвежи. Шапките со широк обод ги штитат лицето, ушите и вратот од директно сонце и се важни за спречување на изгореници и топлотна исцрпеност.
- Осигурете се дека децата внесуваат доволно течности
Во топло време децата имаат потреба од повеќе течности, дури и кога не чувствуваат жед. Водата е најдобриот избор за хидратација. Кај бебињата кои се исклучиво доени може да се понудат почести подои.
Кожата на бебињата е исклучително нежна и може брзо да изгори. Секогаш држете ги бебињата помлади од шест месеци во сенка – без разлика дали сте дома, во двор или на прошетка. Користете чадорче за количка. Никогаш не ја покривајте количката целосно со ќебенце или друга прекривка, бидејќи тоа може да создаде опасен „ефект на рерна“
На бебињата хранети со адаптирано млеко, во денови со високи температури, може да им се понуди изладена превриена вода меѓу оброците. Поттикнувајте ги постарите деца редовно да пијат вода.
- Планирајте ги активностите на отворено паметно
Сончевите зраци се најсилни помеѓу 11 и 15 часот. За време на топлотни бранови, обидете се децата да престојуваат во затворен простор или во сенка во овие часови. Планирајте игра на отворено рано наутро или доцна попладне, кога температурите се пониски. Доколку играат надвор, обезбедете редовни паузи во сенка.
- Препознајте ги знаците на топлотна исцрпеност и топлотен удар
Внимавајте на симптоми како што се вртоглавица, збунетост, губење на апетитот, гадење, обилно потење проследено со бледа и влажна кожа, грчеви, забрзано дишење или силна жед. Ако детето има вакви симптоми, преместете го на ладно место, дајте му да пие вода во мали голтки и разладете ја кожата со влажни крпи. Ако состојбата се влошува или не се подобрува во рок од 30 минути, побарајте итна медицинска помош бидејќи може да станува збор за топлотен удар.
- Создадете свежа и пријатна средина дома
Држете ги завесите и ролетните затворени преку ден за да се намали загревањето од сонцето. Отворајте ги прозорците навечер и рано наутро кога воздухот е посвеж. Доколку користите вентилатори, поставете ги безбедно, надвор од дофатот на децата. Влажни крпи поставени на прозорците или сад со мраз поставен пред вентилаторот може дополнително да помогнат во разладувањето на просторијата.
- Никогаш не оставајте ги децата сами во автомобил
Дури и со отворени прозорци, температурата во автомобилот може опасно да се зголеми за само неколку минути. На ден со температура од 22°C, внатрешноста на автомобилот може да достигне и до 47°C за околу еден час. Никогаш не оставајте бебиња, деца или домашни миленици сами во возило, дури ни за кратко.
- Разладете ги децата преку игри со вода
Разладувањето може да биде и забавно. Детски базенчиња, прскалки, водени балони или едноставно потопување на рацете и нозете во ладна вода можат да помогнат во регулирањето на телесната температура. Млака бања или туширање пред спиење исто така може да им помогне на децата полесно да заспијат во топлите ноќи.
- Посветете внимание на ранливите деца и семејства
Некои деца се изложени на поголем ризик за време на топлотни бранови, особено оние со хронични заболувања, попреченост или многу мали бебиња. Доколку познавате семејства на кои можеби им е потребна дополнителна помош, проверете како се справуваат со горештините. Поддршката и солидарноста во заедницата можат значително да придонесат за безбедноста на најранливите во периоди на екстремни горештини.
