ЦДЦ ОБЈАВИ: Делта варијантата на коронавирусот не предизвикува потешка болест кај децата

Освен тоа, студијата исто така покажува и дека вакцините добро ги штитат адолесцентите од делта варијантата, бидејќи процентот на хоспитализации е околу десет пати повисок за невакцинираните.

Делта варијантата на коронавирусот не предизвикува потешки случаи на КОВИД-19 кај децата и адолесцентите, во однос на другите варијанти на вирусот, покажале првчните податоци од студијата која во петокот ја објавија американските здравствени власти.

Загриженоста поради последиците од делта варијантатата на коронавирусот на младите, се зголемува последниве неколку недели во САД, поради растечкиот број на хоспитализирани деца со КОВИД-19.

Центарот за превенција и контрола на болести на САД – ЦДЦ, главна сојузна агенција за јавно здравство во земјата, ги проучила податоците на пациенти хоспитализирани поради КОВИД-19  во 99 области во 14 сојузни држави.

Агенцијата го споредила периодот од почетокот на март до средината на јуни со оној од средината на јуни до крајот на јули, кога делта сојот стана доминантен во САД. Помеѓу овие два периода, стапката на хоспитализација на деца и млади до 17 години се зголемила пет пати.

Меѓутоа, „процентот на деца и адолесценти примени во болница поради тешка форма на болеста“, како на пример примени на интензивна нега, „бил сличен со пред периодот кога делта варијантата стана доминантна и во текот на нејзиното присуство“.

Освен тоа, студијата исто така покажува и дека вакцините добро ги штитат адолесцентите од делта варијантата, бидејќи процентот на хоспитализации е околу десет пати повисок за невакцинираните. Во САД, Фајзер вакцината може да се прими од 12 годишна возраст.

ЦДЦ, сепак, посочува дека бројот на тешки случаи на КОВИД-19 помеѓу средината на јуни и крајот на јули кај деца и адолесценти бил премногу мал за да споредбите да бидат целосно релевантни. Оттаму нагласуваат дека податоците е неопходно да се следат и во иднина.