Британскиот шеф на службата за јавно здравје Крис Вити денеска изјави дека во моментов децата се оние кои најмногу придонесуваат за пренесување на Ковид-19 и дека скоро сите млади луѓе на возраст од 12 до 15 години кои не се вакцинирани во одреден момент ќе се заразат со вирусот.
„Дефинитивно постои значаен пренос на болеста кај оваа возрасна група. Всушност, како што стојат сега работите, возрасната група за која зборуваме е групата во која во моментов се случува најголемата трансмисија на болеста“, рече Вити пред пратениците на седницата за одлуката да им се понуди вакцина против Ковид-19 на деца на возраст од 12 до 15 години.
- „Огромното мнозинство деца кои не го прележале Ковид-19, ќе се заразат во одреден момент“, рече Вити
На децата во споменатата возрасна група ќе им биде понудена вакцина против Ковид-19, откако Вити и неговите колеги минатата недела проценија дека децата ќе имаат корист од тоа бидејќи нема да има прекин во наставата во училиштата.
Вити посочи дека препораката е донесена исклучиво за доброто на децата и дека не се работи за политичка одлука или одлука која би била од корист на постарите или останати ранливи групи.
