Дали детето манипулира со вас?

Ова е многу интересно прашање бидејќи дури и многу малите деца се свесни за моќта која ја имаат врз своите родители. На пример, ако родителот го земе во раце двегодишното дете секогаш кога ќе заплаче, всушност го тренира да се разбуди и да добие утеха. Ова може да се нарече манипулативно однесување, а можеби тоа и е манипулација.

Децата може да научат да добијат одредени одговори од родителите на многу мала возраст. Тоа не би требало да биде пред 15 месеци старост, но некои деца многу брзо може да ја сфатат динамиката, а родителите тоа може да го воочат. Родителите може да се чувствуваат изманипулирано и тоа може да му го земат за зло на детето. Во тој случај треба да се промени динамика на случувањата. Сетете се кој е родител, а кој дете.

Како родители морате да одредите начин за случувањата околу детето. Ако се обиде да ве изманипулира, бидете цврсти во ставот дека така не може, но дека и понатаму го сакате.

Ако имате повозрасно дете, можеби ќе треба да поставите некои ограничувања, на пример колку долго смее да биде на компјутер. Тогаш вашето дете ќе се обидува да го продолжи ова време, подолго од она што сте го одредиле вие. На ова мора веднаш да изреагирате така што ќе му кажете на детето дека договорот бил на компјутер да помине половина час на ден, а веќе поминале 45 минути. Кажете му дека тоа не е во ред и дека веднаш мора да стане од компјутерот. Предупредете го детето, ако не ги почитува правилата, следниот ден воопшто нема да може да користи компјутер.

Децата ќе ве тестираат. Некогаш  тоа ќе го прават со напади на плач или бес, но секогаш мора да бидете подготвени да се соочите со ваквиот однос на детето, и да го решите.

Се поставува прашањето дали постојат долгорочни последици, доколку на време не се позанимавате со манипулативното однесување на детето?

Одговорот е да. Особено ако е воспоставен таков однос и детето научило како да го добие она што го сака манипулирајќи со родителите. Децата може да бидат многу добри во тоа. Тоа однесување ќе оди во недоглед, најпрво во семејството, но потоа ќе се прошири и на други луѓе, како што се наставниците, врсниците на училиште, или други луѓе со кои детето се сретнува, на пример тренерот. Никој не сака да се чувствува изманипулирано, и луѓето обично чувствуваат кога тоа ќе се случи.

Ако не се посветите на ова, детето ќе се оформи како човек кој има карактерна маана, или некој негативен аспект во карактерот. Тоа ќе го следи засекогаш. Многу е потешко да промените карактер на возрасен човек.

Може да видите секакви однесувања кај возрасните лица, кои биле манипулатори како деца, особено ако станува збор за некој кој сака да се ослободи од својот дел на работа. Таквото лице може да го изманипулира шефот или соработникот, понекогаш дури и не сфаќајќи во целост што се случува.

Манипулирање може да се појави во многу различни форми. Луѓето често ќе го искористат чувството на срам за да го постигнат она што го сакаат. Ќе ги засрамат другите луѓе за да ја постигнат својата цел. Други лица се свесни дека нешто не е во ред кога тоа ќе се случи, но често не ја согледуваат комплетната слика на случувањата. Манипулацијата е тука, но не е очигледна.

Кај децата манипулативното однесување обично е очигледно, но како детето го усовршува манипулирањето, може до толку да го усоврши што ќе ги доведе луѓето до тоа да се чувствуваат непријатно, но да не можат да покажат со прст во него поради тоа. Многу психолози сметаат дека на возраст од 10 или 12 години, веќе многу се задоцнило, доколку не сте се позанимавале со манипулативното однесување на детето. Во секој случај, како детето расте, станува се потешко да се ослободат од ваквото однесување.