Јајцето го поттикнува развојот на детскиот мозок

Истражувањето е спроведено во Еквадор и покажало дека децата кои, почнувајќи од шестиот месец внесувале по едно јајце, во крвта имале значително поголема концентрација на два есенцијални нутриенти за развој на мозокот - докозахексаенска киселина (ДХА) која е важна за раст на мозокот и неговите функции и холин кој помага во контрола на мускулите и на меморијата.

Студија што ја спровело Американското здружение за клиничка исхрана покажала дека јајцата обезбедуваат таква комбинација на нутриенти која поттикнува развој на мозокот и мозочните функции.

Авторот на истражувањето, проф. Лора Џаноти од Универзитетот во Вашингтон вели дека како и млекото и житарките, и јајцата се создадени да го поддржат раниот развој, бидејќи се многу богати со нутритивна содржина.

Затоа и не изненадува што едно јајце дневно може да го забрза развојот на мозокот кај децата и генерално да им го подобри здравјето. Нутриционистите тврдат дека јајцата се природен извор на 13 витамини и минерали, кои се важни не само за развој на мозокот, туку и за здравјето на очите, мускулите, коските, срцето, а се препорачува и за бремените жени.
Покрај овие есенцијални нутриенти, јајцата содржат и витамини А, Б, Д и Е, калциум, железо, фосфор, цинк, селен, како и антиоксидантите лутеин и зеаксантин.

Со резултатите на оваа студија се сложуваат и педијатрите кои до неодамна им советуваа на родители на децата да им даваат цело јајце дури по првата година од животот, поради опасност од алергија. Сега, Американската академија за алергија, астма и имунологија всушност им советува на родителите, секако во консултација со својот лекар, да го разгледаат воведувањето на цело јајце во исхраната на детето штом наполни шест месеци.