Прим. д-р Љиљана Којиќ: Здрави носители на МРСА, кои немаат симптоми на инфекција, треба да одат на училиште

Ако, пак, имате чир, гнојно мозолче, абсцес, болка и оток, тогаш имате активна МРСА инфекција и веројатно е дека ќе ја ширите бактеријата во својата околина

Најголемиот број луѓе со активна МРСА инфекција се излекувани и веќе ја немаат. Но, понекогаш МРСА инфекцијата се враќа повеќе пати

ПИШУВА:
Прим. д-р Љиљана Којиќ
педијатар

♦♦♦♦♦♦♦
 

МРСА ИНФЕКЦИЈА – II ДЕЛ,
продолжение на МРСАТА НЕ Е ЕБОЛА
Одбрана на едно дете од МРСА инфекција е добро информиран родител

Златна стафилокока (Staphylococcus Aureus) е топчеста бактерија, која ја има во носот на еден од тројца луѓе на нашава планета. Тоа буквално значи дека 30% од светската популација ја има или на својата кожа или во носот. Значи, воопшто не е ретка, ниту пак, така опасна во вонболнички услови и кај луѓе што немаат повредена кожа, како влезна врата. МРСА (Метицилин-резистентен златен стафилокок – Methicyllin Resistant Staphylococcus Aureus) е поотпорен вид на златниот стафилокок, и со самото тоа, е потежок за лекување.

Дури и да се лекувани, членовите на семејството можат да се реколонизираат повторно, но третманот може да биде ефикасен во спречување на повторна појава на активна инфекција: Прим. д-р Љиљана Којиќ, педијатар

» Дали сум заразен кога имам МРСА инфекција?

Да. Ако имате чир, гнојно мозолче, абсцес, болка и оток, тогаш имате активна МРСА инфекција и веројатно е дека ќе ја ширите бактеријата во својата околина.Затоа е исклучително важно инфицираната рана, чир, или абсцес да се затворени со завој или фластер и да ги миете и дезинфицирате рацете, по допирањето на инфицираната регија.

» Дали е сигурно баба/дедо кои имаат МРСА во носот, да ги галат и допираат внучињата?

Да. Ризикот од пренос на МРСА на внучињата е многу мал. Можно е да ја пренесете ако го пипкате носот и потоа допирате некој друг, без да си ги измиете рацете. Миењето раце, или дезинфекција со гел пред да допрете некој друг ќе помогне во превенција на ширењето на МРСА во околината. Но, генерално, бабата и дедото со МРСА во носот и добри хигиенски навики смеат да се гушкаат со внучињата, без проблем.

Генерално, бабата и дедото со МРСА во носот и добри хигиенски навики смеат да се гушкаат со внучињата, без проблем

» Треба ли моето дете да биде отстрането од часови (или градинка) ако има МРСА?

Оние кои се само колонизирани и се здрави носители на МРСА, и немаат симптоми на инфекција, треба да одат на училиште и на работа.

И оние кои имаат активна МРСА инфекција можат да одат и на работа и на училиште ако:

  • Раната им е покриена со завој – фластер
  • Ако раната не треба да се преврзува за време на одењето на часови (работа)
  • Ако инфицираната личност (дете или возрасен) е во состојба да одржува лична хигена (миење раце )

Додека МРСА инфекцијата не се излекува, децата и возрасните со МРСА инфекција не треба да користат базени, џакузи или да учествуваат во спортски активности, зашто завојот може да им отпадне

» Колонизиран сум со МРСА и имам неколку деца. Треба ли да ги тестирам да видам дали и тие се колонизирани?

Не. Освен ако во семејството не се појави ширење на кожна инфекција и таа да се повторува, при што Вашиот лекар може да донесе одлука да ги тестира и другите членови на семејството. Ако тоа се случува (ширење на активна инфекција која се повторува), и домашните миленици, кои исто така можат да бидат носители на МРСА треба да се тестираат – да им се земат брисеви. Ако тестот е позитивен, Вашиот лекар ќе ви даде маст и/или капки да ги ставате во нос за да се излекува носителството.

Дури и да се лекувани, членовите на семејството можат да се реколонизираат повторно, но третманот може да биде ефикасен во спречување на повторна појава на активна инфекција.

» Имам МРСА на мојата кожа и сакам да го заштитам семејството и пријателите. Треба ли се да пребришувам и да дезинфицирам, откако ќе го допрам? Треба ли да имам засебен телефон?

Не. Не треба да дезинфицирате се што ќе допрете, ниту пак ви треба засебен телефон. Се што треба да правите е да миете раце често, да се бањате редовно и инфицираните рани да ги покривате со чисти, стерилни завои редовно.

» Каде да ги фрлам загадените завои и фластери по преврска на мојата рана?

Сосема е доволно да ги фрлите во засебна кеса во обична канта за смет. Нема потреба од санитарен контејнер.

Исклучително е важно инфицираната рана, чир, или абсцес да се затворени со завој или фластер и да ги миете и дезинфицирате рацете, по допирањето на инфицираната регија

» Ако некој добие МРСА, дали засекогаш ќе ја има?

Можеби. Најголемиот број луѓе со активна МРСА инфекција се излекувани и веќе ја немаат. Но, понекогаш МРСА инфекцијата се враќа повеќе пати. Ако тоа се случува, Вашиот доктор ќе ви каже како тоа да го спречите и како да ги заштитите останатите членови на семејството од ширење на инфекцијата.

Дури и ако активната инфекција е излекувана, вие се уште можете да ја имате бактеријата МРСА на Вашата кожа или во носот. И можете, иако ја имате бактеријата во носот и кожата никогаш веќе да не се разболите. Тогаш сте здрав клицоносител. Но можете да ја ширите бактеријата во околината. Зошто некој станува здрав клицоносител, а некој не, не е сосема јасно ниту доволно проучено во медицинската наука.

ПОВЕЌЕ ОД ИСТИОТ АВТОР, ПРИМ. Д-Р ЉИЉАНА КОЈИЌ:

ПОВРЗАНИ НАПИСИПОВЕЌЕ ОД АВТОРОТ